Թուրքիայի խորհրդարանի դռնփակ նիստում կքննարկվի Իրաքում ու Սիրիայում անդրսահմանային գործողություններ ձեռնարկելու հարցը
Թուրքական Dünya Bülteni լրատվական կենտրոնի փոխանցմամբ՝ վաղը դռնփակ պայմաններում կանցկացվի Թուրքիայի խորհրդարանի նիստը, որում քննարկվելու են Իրաքի ու Սիրիայի տարածքում անդրսահմանային ռազմական գործողություններ իրականացնելն արտոնող օրինագծերը:
Այս մասին հայտարարել է իշխող «Արդարություն ու զարգացում» կուսակցության (ԱԶԿ) խորհրդարանական խմբակցության փոխնախագահ Մուսթաֆա Էլիթաշը: Նրա խոսքերով՝ խորհրդարանի դնռփակ նիստում քննարկվելու է «Իսլամական պետություն» ու «Քրդստանի աշխատավորական» կուսակցության (PKK) սպառնալիքներին ռազմական պատասխան տալու հարցը:
Իրաքի տարածքում անդրսահմանային գործողությունների անցկացումը Թուրքիայի խորհրդարանը շարունակ մեկ տարով երկարաձգում է 2006 թվականից, իսկ Սիրիայի պարագայում՝ 2012 թվականից: Թուրքիայի խորհրդարանի համար օրենսդրական նոր տարին մեկնարկում է այսօր՝ հոկտեմբերի 1-ին:
