Լուրջ հարաբերությունների հաստատման համար համացանցը լավագույն միջոցը չէ. հետազոտություն
Միչիգանի համալսարանի մասնագետներն ուսումնասիրել են համացանցի միջոցով ծանոթացած անձանց ռոմանտիկ հարաբերությունների զարգացումն իրական կյանքում եւ եկել են այն եզրահանգման, որ նման ծանոթությունների արդյունքում ամուսնություններն ավելի հաճախ են ավարտվում ամուսնալուծությամբ:
Վերլուծելով How Couples Meet and Stay Together-ի հարցման արդյունքները, որոնց մասնակցել է 2923 մարդ, նրանք արձանագրել են, որ ներկայումս ընտանիքների 67%-ն ամուսնացել են իրական կյանքում ունեցած հարաբերությունների արդյունքում, համացանցի միջոցով ծանոթացած զույգերը կազմում են 32%:
Ընդ որում, իրական կյանքում ծանոթացած զույգերի շրջանում ամուսնալուծությունների ցուցանիշը կազմում է 2%, իսկ համացանցի միջոցով ծանոթացած զույգերի շրջանում՝ 8%:
Մասնագետները չնայած նշում են, որ ստացված տվյալները պետք չէ միանշանակ ընդունել, բայց միաժամանակ ընդգծում են, որ կայքերի օգտատերերի տվյալները ոչ միշտ կարող են արժանահավատ լինել, ինչն էլ հետագայում կարող է խնդիրներ առաջացնել:
