Բողոքի ակցիա. նաիրիտցիները նախագահականի դիմաց պահանջում են իրենց աշխատավարձը
Այսօր «Նաիրիտ» գործարանի աշխատակիցները հավաքվել են նախագահի նստավայրի դիմաց և պահանջում են իրենց մոտ մեկ տարվա աշխատավարձը։ Գործարանի արհմիության կոմիտեի նախագահ Հրաչ Թադևոսյանին ընդունել է նախագահի աշխատակազմի վերահսկողության բաժնի պետի տեղակալը։
Նաիրիտցիներին խոստացել են այս շաբաթ մեկ ամսվա աշխատավարձ, մյուս շաբաթ ևս վճարել մեկ ամսվա աշխատավարձ։ «Նաիրիտի» վերագործարկման մասին խոսակցություն չի եղել։ Թադևոսյանն արդեն դուրս է եկել նախագահականից, սակայն աշխատակիցները չեն հեռանում, նրանց մի մասը երթով գնեացել է դեպի կառավարության շենքի մոտ։
Հրաչ Թադևոսյանը 168.am-ին հայտնեց, որ հիմա արդեն պետք է մարդիկ տուն գնան, իսկ վաղը և հաջորդ օրերին հավաքվեն գործարանի մուտքի մոտ։ Աշխատակիցների խոսքով՝ իրենք թույլ չեն տա, ոչ մեկը մտնի գործարան, քանի դեռ չի վճարվել աշխատավարձի պարտքը։
Լուսանկարը՝ Գագիկ Շամշյանի
