Համայնքի արդեն նախկին ղեկավարը մեղադրվում է յուրացման մեջ
2005-2012թթ. Շիրակի մարզի Վարդաղբյուր գյուղական համայնքի ղեկավար պաշտոնավարած Հրաչիկ Բալոյանին յուրացման մեղադրանք է առաջադրվել: Այսպես, ըստ մեղադրանքի՝ նա, օգտագործելով իր պաշտոնեական դիրքը, նույն համայնքի աշխատակազմի առաջատար մասնագետ-հաշվապահ Վարդուհի Խաչատրյանի օժանդակությամբ, շահադիտական նպատակով պաշտոնեական փաստաթղթերում ակնհայտ կեղծ գրառումներ կատարելով, յուրացման եղանակով կատարել է ուրիշի գույքի խոշոր չափի հափշտակություն: Այս մասին տեղեկացնում է «Փաստինֆոն»:
Բացի այդ, ըստ մեղադրական եզրակացության՝ Հ.Բալոյանը գյուղապետարանի շենքը չի վերանորոգել, 320.000 ՀՀ դրամ արժողության շինանյութը և գործիքները յուրացրել է՝ գյուղապետարանին պատճառելով զգալի չափի՝ 320.000 ՀՀ դրամի գույքային վնաս:
Վարդուհի Խաչատրյանին, ով 2005թ.-ից մինչև օրս աշխատում է Վարդաղբյուր գյուղական համայնքի աշխատակազմի առաջատար մասնագետ-հաշվապահ, մեղադրանք է առաջադրվել, ըստ որի՝ 2010-2012թթ. օժանդակել է համայնքի ղեկավար Հ.Բալոյանին՝ շահադիտական նպատակով պաշտոնեական փաստաթղթերում ակնհայտ կեղծ գրառումներ կատարելով, յուրացման եղանակով ուրիշի գույքի խոշոր չափի հափշտակություն կատարելուն:
Իսկ 2010թ.-ից մինչև օրս Վարդաղբյուր գյուղական համայնքի ղեկավարի աշխատակազմի քարտուղար Ազնիվ Սարգսյանին մեղադրանք է առաջադրվել, ըստ որի՝ նա համայնքի ղեկավար Հ.Բալոյանի հանձնարարությունները կատարելու դրդումամբ կազմել է կեղծ արձանագրություններ, վավերացրել ստորագրությամբ և կնիքով:
Հրաչիկ Բալոյանին մեղադրանք է առաջադրվել ՀՀ քրեական օրենսգրքի 179-րդ հոդվածի երկրորդ մասի առաջին և երրորդ կետերով՝ պաշտոնեական դիրքն օգտագործելով՝ խոշոր չափերով յուրացնելը կամ վատնելը և 314-րդ հոդվածով՝ Պաշտոնեական կեղծիքը:
Վարդուհի Խաչատրյանին մեղադրանք է առաջադրվել՝ ՀՀ քրեական օրենսգրքի 38-179-րդ հոդվածի երկրորդ մասի առաջին և երրորդ կետերով՝ պաշտոնեական դիրքն օգտագործելով՝ խոշոր չափերով յուրացնելուն կամ վատնելուն օժանդակելը և 314-րդ հոդվածով:
Ազնիվ Սարգսյանը մեղադրվում է ՀՀ քրեական օրենսգրքի 314-րդ հոդվածով:
Գործն ընդունվել է Շիրակի մարզի ընդհանուր իրավասության դատարանի դատավոր Մարտին Սարոյանի վարույթ:
