Աուրելիա Գրիգորիուն կարող է պաշտոնանկ արվել
«Ազատություն» ռադիոկայանի փոխանցմամբ՝ Մոլդովայի խորհրդարանական փաստաբան Աուրելիա Գրիգորիուն, ով վերջերս Երևանում իրավապաշտպանների միջազգային խորհրդաժողովում հանդես է եկել Հայաստանին հասցեագրված սկանդալային քննադատությամբ, կարող է ազատվել աշխատանքից։
«Ինտերֆաքս» լրատվական գործակալության փոխանցմամբ, Մոլդովայի խորհրդարանի խոսնակ Իգոր Կորմանը այցելել է Մոլդովայի մարդու իրավունքների պաշտպանության կենտրոն եւ խնդրել այդ հաստատության տնօրեն Անատոլի Մունտյանուին «գործընկեր օմբուդսմենների հետ քննարկել իրավիճակը, որը ստեղծվել է Գրիգորիուի հայտարարություններից հետո»։
«Մենք ոչ մի դեպքում չպետք է թույլ տանք այնպիսի մեկնաբանություններ, որոնք վնաս կհասցնեն Մոլդովայի վարկին և այլ պետությունների հետ հարաբերություններին։ Հայաստանի և Ադրբեջանի միջև կա հին ու ցավոտ հակամարտություն, մինչդեռ, մենք շատ լավ հարաբերություններ ունենք թե՛ մեկ եւ թե՛ մյուս երկրի հետ», – ասել է Իգոր Կորմանը։
«Մենք համագործակցում ենք «Արևելյան գործընկերության» շրջանակներում և մտադիր ենք պահպանել մեր լավ կապերը, ուստի պարտավոր ենք զերծ մնալ այնպիսի հայտարարություններից, որոնք վնաս կհասցնեն այդ երկու երկրներից մեկի հետ մեր կապերին», – ասել է Մոլդովայի խորհրդարանի խոսնակը։
Կորմանի փոխանցմամբ, այս հարցը հարկ է քննարկել մարդու իրավունքների և ազգամիջյան հարաբերությունների խորհրդարանական հանձնաժողովում, որտեղ իր տեսակետը պետք է հայտնի նաեւ տիկին Գրիգորիուն։
Կորմանը ասել է, որ «խորհրդարանական փաստաբանի մանդատը կարող է վաղաժամ ավարտվել՝ եթե նման դիմում ներկայացվի երկրի նախագահի կամ խորհրդարանի 20 պատգամավորների կողմից։
«Կոմունիստական ընդդիմությունն էլ պետք է հետաքրքրություն դրսևորի, քանի որ Գրիգորիուն 2008 թվականին այդ պաշտոնում է առաջադրվել կոմունիստների խմբակցության կողմից։ Կարծում եմ, բոլորս ենք շահագրգռված, որ այդ թեման փակվի և նման իրավիճակներ ապագայում այլևս չլինեն», – ասել է Մոլդովայի խորհրդարանի ղեկավարը։
Աուրելիա Գրիգորիուն հուլիսի 4-ին Երևանում հայտարարել է, թե «Հայաստանը ցեղասպանություն է իրականացրել Ադրբեջանի ժողովրդի նկատմամբ, պատերազմ է հայտարարել հարևանին և օկուպացրել դրա տարածքի 20 տոկոսը»։
Ի դեպ, հուլիսի 11-ին Հայաստանի նախագահ Սերժ Սարգսյանը աշխատանքային այցով մեկնում է Քիշնև, որտեղ կմասնակցի Եվրոպական ժողովրդական կուսակցության Արևելյան գործընիկերության առաջնորդների երրորդ գագաթնաժողովին։ Նախատեսված է նաև հանդիպում Մոլդովայի նախագահի հետ։
Վերլուծաբանները չեն բացառում, որ Հայաստանի և Մոլդովայի ղեկավարների հանդիպումներում կարող է արծարծվել նաև Աուրելիա Գրիգորիուի սկանդալային հայտարարությունների խնդիրը, որը կողմերը կփորձեն լուծել՝ առաջնորդվելով երկկողմ բարեկամական հարաբերությունները պահպանելու նպատակով։
