Հայաստանը ԱԷՄԳ համար հուսալի գործընկեր է
Հայաստանը ԱԷՄԳ համար հուսալի գործընկեր է: Այս մասին այսօր՝ հուլիսի 1-ին, Հայաստանի ԱԳ նախարարի տեղակալ Աշոտ Հովակիմյանի հետ հանդիպման ժամանակ նշել է Ատոմային էներգիայի միջազգային գործակալության (ԱԷՄԳ) տնօրենի տեղակալ, տեխնիկական համագործակցության ստորաբաժանման տնօրեն Կուակու Անինգը:
ԱԳՆ մամուլի ծառայությունից հայտնում են, որ զրուցակիցները փաստել են, որ Հայաստանը ԱԷՄԳ համար հուսալի գործընկեր է, և ԱԷՄԳ կողմից Հայաստանին տրամադրվող տեխնիկական աջակցությունը ծառայում է իր նպատակին` ուղղված լինելով ՀԱԷԿ տեխնիկական վերազինմանը և անվտանգության ամրապնդմանը: ԱԷՄԳ աջակցությամբ յուրաքանչյուր տարի վերապատրաստվող հայ մասնագետները ծանոթանում են միջուկային ոլորտի զարգացումներին և ձեռք բերում անհրաժեշտ գիտելիքներ ու փորձ, որը նրանց հնարավորություն կընձեռի այլ երկրներում հանդես գալու որպես փորձագետներ:
Կարևորելով իր առաջին այցը Հայաստան` Կ. Անինգը նշել է, որ ԱԷՄԳ-ը մեծ նշանակություն է տալիս վերահսկողական մեխանիզմների արդյունավետ կիրառմանը, քանի որ դրանք միջուկային անվտանգության ապահովման հենասյունն են: Կ. Անինգն ընդգծել է, որ Հայաստանը ոչ միայն շահում է ԱԷՄԳ տեխնիկական համագործակցության ծրագրից, այլ նաև դրանում ունենում իր կարևոր ներդրումը:
Փոխնախարար Հովակիմյանը շեշտեց, որ Հայաստանը կարևորում է ԱԷՄԳ հետ հարաբերությունների հետագա սերտացումը` Հայկական ատոմակայանի անվտանգության շարունակական և հետևողական ամրապնդման, ինչպես նաև նոր ատոմակայանի կառուցման տեսանկյունից:
