Այսօրվանից ՀՀ-ում նվազագույն աշխատավարձը 45 հազար դրամ է
Այսօրվանից՝ հուլիսի 1-ից, ուժի մեջ են մտել «Նվազագույն ամսական աշխատավարձի մասին» օրենքում Ազգային ժողովի կողմից հունիսի 20-ին կատարված փոփոխությունները:
Ըստ այդմ՝ Հայաստանի Հանրապետությունում նվազագույն ամսական աշխատավարձը սահմանվել է 45 հազար դրամ՝ մինչ այդ գործող 35 հազար դրամի փոխարեն:
Սրանից բխող փոփոխվել են նաև գործավարձով և ժամավճարով վարձատրվող աշխատակիցների համար ժամային տարիֆային դրույքի նվազագույն չափը:
Աշխատաժամանակի նորմալ տևողության դեպքում (40-ժամյա աշխատանքային շաբաթ) ժամային տարիֆային դրույքի նվազագույն չափը սահմանվել է 270 դրամ՝ մինչ այդ գործող 210 դրամի փոխարեն:
Աշխատաժամանակի կրճատ տևողության դեպքում (36-ժամյա աշխատանքային շաբաթ)` 300 դրամ՝ նախկին 234 դրամի փոխարեն:
Աշխատաժամանակի կրճատ տևողության դեպքում (24-ժամյա աշխատանքային շաբաթ)` 450 դրամ՝ նախկին 350 դրամի փոխարեն:
