ԱԺ պատգամավորի ընտանիքին պատկանող հյուրանոց-առողջարանից կբռնագանձվի ավելի քան 14 միլիոն դրամ
tesankyun.am-ի փոխանցմամբ՝ ՀՀ պետական եկամուտների կոմիտեի Իջևանի տարածքային հարկային տեսչությունը հարկային ստուգումներ կատարելով «Դիլիջան առողջարան» ՓԲԸ-ում՝ հայտնաբերել է հարկային խախտումներ: Ըստ «Դատալեքս» տեղեկատվական կայքի՝ Իջևանի ՏՀՏ-ն դիմել է ՀՀ վարչական դատարան 18 միլիոն 390 հազար 763 դրամ գանձելու պահանջով:
Հակընդդեմ հայցով պատասխանող կողմը պահանջել է « չեղյալ համարել Իջևանի ՏՀՏ-ի կողմից 2013թ. հունվարի 9-ին կազմած թիվ 1008042 ստուգման ակտի «Շահութահարկ» բաժնի 1-ին կետը և «5. Ավելացված արժեքի հարկ» բաժնի 1-ին և 4-րդ պարբերությունները, ինչպես նաև փոփոխել «1. «Շահութահարկ» բաժնի 2-րդ կետը՝ համախառն եկամտից նվազեցվող ծախսերի և հարկային վնասների հետ կապված»:
Հունիսի 27-ին ՀՀ վարչական դատարանի Սևանի նստավայրի դատավոր Հովհաննես Թորոսյանը վճռել է Իջևանի տարածքային հարկային տեսչության հայցն ընդդեմ «Դիլիջանի առողջարան» ՓԲԸ-ի բավարարել մասնակի և այդ ընկերությունից պետբյուջե բռնագանձել 14 միլիոն 235 հազար 498 դրամ, հայցը մնացած՝ 4 միլիոն 155 հազար 265 դրամ բռնագանձելու պահանջի մասով, մերժել:
Սույն վճռի դեմ մեկամսյա ժամկետում կարող է վերաքննիչ բողոք բերվել: Դիլիջան քաղաքի Գետափնյա 66 հասցեում գործող առողջարան-հյուրանոցը Դիլիջանի ամենաշքեղ հանգստյան օբյեկտներից է, այն հայտնի է նաև «Դիլիջան Ռեզորթ» անունով:
tesankyun.am-ի աղբյուրների փոխանցմամբ՝ այն պատկանում է ԱԺ պատգամավոր Արկադի Համբարձումյանի (հայտնի է «Դերժավայի Արկադի» անունով) ընտանիքին:
