Բյուրականում տեղի կունենա հայ-վրացական աստղագիտական կոլոքվիում
Օգոստոսի 26-28-ը ՀՀ ԳԱԱ Բյուրականի աստղադիտարանում (ԲԱ) տեղի կունենա «Աստղերի անկայունությունը և էվոլյուցիան» թեմայով հայ-վրացական աստղագիտական կոլոքվիում (խորհրդակցություն)` նվիրված ակադ. Լ.Վ. Միրզոյանի 90-ամյակին: Նման միջոցառումների ավանդույթը դեռևս 1970-ական թթ. սկզբներին դրել է Վիկտոր Համբարձումյանը` ի նշան հայ-վրացական բարեկամության և աստղագիտության ոլորտում հայ-վրացական համագործակցության:
Այդ կոլոքվիումների ընթացքում տեղի են ունենում գիտական նստաշրջաններ, քննարկումներ, ինչպես նաև մարզական միջոցառումներ և բարեկամական հանդիպումներ:
Սովորաբար հայ-վրացական կոլոքվիումները ամեն տարի հաջորդում էին իրար` անցկացվելով մեկ Բյուրականում, մեկ Աբասթումանում (Վրաստանի ազգային աստղադիտարանում), և յուրաքանչյուր կողմից ներկայացվում էին շուրջ 15-ական զեկուցումներ վերջին տարիների արդյունքների վերաբերյալ: Սակայն 1980-ականներից սկսած կոլոքվիումներն անկանոն են անցկացվել, և արդյունքում այս տարվա կոլոքվիումն ընդամենը 14-րդն է: Նշենք նաև, որ թե՛ Համբարձումյանը և թե՛ Միրզոյանը մեծ ներդրում են ունեցել վրաց աստղագիտության զարգացման գործում. մասնավորապես նրանց շնորհիվ հաստատվել են մի շարք համագործակցության ծրագրեր, վրացի աստղագետները վերապատրաստվել են Բյուրականի աստղադիտարանում, Համբարձումյանը և Միրզոյանը եղել են նրանցից մի քանիսի գիտական ղեկավարները: Վերջին տարիներին էլ, մեր աստղագետները համագործակցության նոր ծրագրերով նպաստում են վրաց աստղագիտությանը. օրինակ ԲԱ և ՀՀ ԳԱԱ Ինֆորմատիկայի և ավտոմատացման խնդիրների ինստիտուտի ջանքերով հիմք դրվեց վրացական վիրտուալ աստղագիտությանը:
Հայկական աստղագիտական ընկերություն
