Բաբկեն Հարությունյան. Մեր միջև տեղի ունեցավ զրույց, որին հաջորդեց հարվածներ իմ ուղղությամբ
Maxinfo.am կայքի հիմնադիր Բաբկեն Հարությունյանը հայտարարություն է տարածել, որում ասված է.
«Ելնելով ժողովրդավարության և ազատ մամուլի կայացման անհրաժեշտությունից maxinfo.am լրատվավերլուծական կայքը նախաձեռնել է ֆոտոռեպորտաժների շարք` ցույց տալու համար երկրում առկա սոցիալական սուր բևեռվածության մթնոլորտը, ինչպես նաև անդրադառնալու տարաբնույթ հիմնախնդիրների:
Վերոնշյալ նպատակներից ելնելով` ֆոտոռեպորտաժ իրականացրեցի Կանաչուտ գյուղի Ալիկ Սարգսյանի անվան փողոցում, որտեղ գտնվում է Սարգսյանների շքեղ առանձնատունը: Ստորև ներկայացնում եմ եղելությունը.
Հունիսի 17-ին ֆոտոխցիկի միջոցով նկարելով վերոնշյալ հասցեում գտնվող առանձնատան ճակատային հատվածը, ընդ որում՝ նկարահանումն իրականացրեցի` մուտք չգործելով Սարգսյանների սեփականություն հանդիսացող տարածք:
Նկարահանումից հետո շարունակեցի ճանապարհս: Մի քանի կիլոմետր երթևեկելուց հետո հանկարծահաս «Մերսեդես» մակնիշի մեքենան կտրելով իմ մեքենայի դիմացը` ստիպեց արգելակել:
Վթարից խուսափելու համար արգելակեցի իմ մեքենան: Իջնելով մեքենայից` ինձ մոտեցավ այդ նույն «Մերսեդես» մակնիշի ավտոմեքենայի վարորդը, ով ՀՀ նախագահի խորհրդական` Ալիկ Սարգսյանի եղբայր Անդրանիկ Սարգսյանն էր, ում հետ երբևէ առընչություն չեմ ունեցել: Անդրանիկ Սարգսյանը տեղեկանալով թե ով եմ, և թե ինչու եմ ֆոտոխցիկով նկարել իրենց առանձնատունը` առանց ինձ հարցնելու իմ մեքենայի միջից հանեց մեքենայիս բանալին` թույլ չտալով օգտվել իմ իսկ սեփականությունից:
Մեր միջև տեղի ունեցավ զրույց, որին հաջորդեց հարվածներ իմ ուղղությամբ: Ես ստիպված եղա հեռանալ, թողնելով մեքենաս այն վիճակում, ինչպես կայանել էի: Մոտ մեկ ժամ անց ինձ զանգահարեցին Ոստիկանությունից և տեղեկացրեցին, որ մեքենան գտնվում է իրենց մոտ:
Ինչպես հետո պարզվեց Ոստիկանություն էր դիմել հենց Անդրանիկ Սարգսյանը: Վերցնելով մեքենաս ոստիկաններից բողոքս հայտնեցի իմ նկատմամբ իրականացված ապօրինի գործողությունների մասով:
Հիմնվելով ազատ խոսքի և ժողովրդավարության սկզբունքների վրա` անընդունելի եմ համարում «Չորրորդ իշխանության» ներկայացուցիչների դեմ կատարվող ոտնձգությունները և բռնությունները: Դատապարտելի եմ համարում բարձրաստիճան պաշտոնյաների, ինչպես նաև նրանց ազգականների ֆեոդալավայել կեցվածքը, առավել ևս, երբ խոսքը վերաբերում է ՀՀ նախագահի խորհրդականի ինստիտուտին: Պահանջում եմ գործի ընթացքի անաչառության ապահովում իրավապահ մարմինների կողմից:
Վստահեցնում եմ, որ բոլոր օրինական ձևերով պայքարելու եմ իմ սահմանադրական իրավունքի պաշտպանության համար»:
