Գյուղացիները պահանջում են վերականգնել կաթի մթերման գինը
Այսօր Շիրակի մարզի մի շարք գյուղերում կաթ մթերող ընկերությունները առանց որևէ մեկնաբանության իջեցրել են կաթի մթերման գինը. նախկին 150-ի փոխարեն գյուղացիներից կաթը գնում են 140 դրամով, այս մասին galatv.am-ին տեղեկացրեց Շաղիկ գյուղի բնակիչ Անդրանիկ Սիմոնյանը:
«Առավոտյան եկան, ասեցին, որ կաթի գինը 10 դրամով իջեցրել են, ժողովուրդը համաձայն չէ, ոչ մեկն էլ կաթը չի տվել»: Գյուղերում ներկայումս եկամտի միակ աղբյուրը անասնապահությունն է, քանի որ կարկտի պատճառով զրկվել են բերքից, ուստի այս նորությունը վրդովեցրել է գյուղացիներին: «Ճանապարհները փակել են, կաթի ավտոները ներքև չեն գա: Իրենք քնին-ելնին գները կփոխեն, քներից երբ զարթնան, կաթի գինը կգցեն»,- նշել է Անդրանիկ Սիմոնյանը:
Վերջինս տեղեկացրել է, որ այս վիճակում են նաև հարևան Բերդաշեն, Կառնուտ, Շուռաբադ գյուղերը, որոնց բնակիչները միավորվել և փակել են Շուռաբադ գյուղի ճանապարհը`պահանջելով վերականգնել կաթի մթերման նախկին գինը: «Ես ունեմ 50 կաթնատու կով, օրական վաճառում եմ 500 լիտր կաթ, նույնիսկ 10 դրամը ինձ և մյուս գյուղացիների համար մեծ նշանակություն ունի, ես 4 աշխատող եմ պահում, հիմա ինչ եմ անելու»:
Ինչպես տեղեկացրել են գյուղացիները` կաթի մթերման գինը իջեցրել են միաժամանակ բոլոր ընկերությունները՝ «Իգիթ»-ը, «Աշտարակ կաթ»-ը, «Ազատան»-ը և մյուսները:
