Սուրիկ Խաչատրյանը շարունակում է մնալ Սյունիքի մարզպետ. պարզաբանում են կառավարությունից
Henaran.am-ը փորձել է Սյունիքի մարզպետարանից հետաքրքրվել՝ ինչ է նշանակում մարզպետ Սուրիկ Խաչատրյանի տարածած երեկվա հայտարարությունը, թե մինչև հունիսի 2-ին տեղի ունեցած սպանության գործի նախաքննության ավարտը մարզպետը վայր է դնում իր լիազորությունները, քանի որ այն հակասում է ՀՀ օրենսդրությանը: Մարզպետարանից չեն կարողացել մեկնաբանել հայտարարության հակասությունը, նաև չեն նշել, թե ով է այս պահին Սյունիքի մարզպետի պաշտոնակատարը:
Կառավարության նիստի առաջիկա օրակարգում, ըստ Henaran.am-ի աղբյուրների, ընդգրկված չէ Սուրիկ Խաչատրյանի հրաժարականի հարցը: «Նա աշխատանքից ազատվելու դիմում չի ներկայացրել, և կառավարությունը չի կարող քննարկել դիմումը»,-նշել է Henaran.am-ի կառավարությանը մոտ կանգնած աղբյուրը:
Ըստ լրատվամիջոցի՝ Սուրիկ Խաչատրյանի հայտարարությունը կառավարությունում լուրջ չի ընդունվում, և նա փաստացի շարունակում է մնալ մարզպետ:
Աղբյուրի պարզաբանմամբ, կառավարությունը կարող է պաշտոնանկ անել Սուրիկ Խաչատրյանին, բայց քանի որ հարցը իրավական ոլորոտում է, առայժմ չեն ուզում սեփական նախաձեռնությամբ հանդես գալ: Որոշ տեղեկություններով, Սուրիկ Խաչատրյանի հարցը քննարկվելու է հինգշաբթի օրը կայանալիք ՀՀԿ գործադիր մարմնի նիստում :
