Ադրբեջանը հուսով է նախագահական ընտրություններից հետո ակտիվացնել Ղարաբաղյան բանակցային գործընթացը
Ռուսական РИА Новости լրատվական գործակալության փոխանցմամբ՝ Ադրբեջանը հուսով է ընտրություններից հետո ակտիվացնել Ղարաբաղյան բանակցային գործընթացը: Այս մասին այսօր Մոսկվայում իր ռուս գործընկեր Սերգեյ Լավրովի հետ բանակցությունների արդյունքներով հայտարարել է Ադրբեջանի արտգործնախարար Էլմար Մամեդյարովը.
«Այսօր մենք քննարկել ենք Ղարաբաղյան հակամարտության կարգավորման հարցը: Մենք առաջին հերթին ակնկալում ենք, որ կհաղթահարվի լճացումը, որին բախվել է բանակցային գործընթացը:
Երբ Ադրբեջանում մինչև տարեվերջ կավարտվի ընտրական գործընթացը, անհրաժեշտ է կրկնապատկել մեր ջանքերը՝ այդ վճռորոշ հակամարտության կարգավորման գործընթացում առաջընթաց գրանցելու համար»:
Ադրբեջանում նախագահական ընտրությունները պետք է անցկացվեն հոկտեմբերին:
