Գաբալայի ՌՏԿ-ի ու «Բաքու-Նովոռոսիյսկ» նավթամուղի հարցերը չեն ազդել ռուս-ադրբեջանական հարաբերությունների վրա. Լավրով
Ադրբեջանական Trend լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովն Ադրբեջանի արտգործնախարար Էլմար Մամեդյարովի հետ համատեղ մամուլի ասուլիսի ժամանակ հայտարարել է, որ Ռուսաստանի կողմից Գաբալայի ռադիոտեղորոշիչ կայանի շահագործման և «Բաքու-Նովոռոսիյսկ» խողովակաշարով ադրբեջանական նավթի տարանցման դադարեցումը չի ազդել երկու երկրների փոխհարաբերությունների վրա և չի վատթարացրել դրանք:
Գաբալայի ՌՏԿ-ի հետ կապված՝ Լավրովը հայտարարել է, որ վաղուց հայտնի է, որ կողմերին չի հաջողվել պայմանավորվածության գալ վարձավճարի շուրջ, իսկ մնացյալ խոսակցություններն անհիմն են:
Լավրովն ընդգծել է, որ «Բաքու-Նովոռոսիյսկ» խողովակաշարով ադրբեջանական նավթի տարանցման կասեցումն ունի մաքուր տնտեսական պատճառներ՝ հավելելով, որ կողմերը ներկայումս նոր պայմանագիր են պատրաստում նավթի տարանցման շուրջ, ինչը կարտացոլի տնտեսական նոր իրողությունները:
Էլմար Մամեդյարովը նույնպես կոչ է արել չքաղաքականացնել տվյալ հարցերը:
