Moody’s-ը Թուրքիայի վարկային վարկանիշը բարձրացրել է մինչև ներդրումային մակարդակի
Ռուսական ИТАР-ТАСС լրատվական գործակալության փոխանցմամբ՝ Moody’s միջազգային վարկանիշային գործակալությունը երեկ բարձրացրել է Թուրքիայի վարկային երկարաժամկետ վարկանիշը: Այն հասցվել է մինչև ներդրումային մակարդակի՝ Baa3:
Գործակալությունը Թուրքիայի համար հաստատել է դրական, կայուն վարկային կանխատեսում: Տվյալ որոշման ընդունման վրա ազդել են Թուրքիայի տնտեսությունում դրական միտումների ուժգնացումը և ազգային ֆինանսական սեկտորի առողջացումը: Անկարան զգալիորեն լավ է պաշտպանված դրսից և մասնավորապես ճգնաժամի մեջ գտնվող ԵՄ-ից տնտեսական հնարավոր բացասական ազդեցությունից:
Նյու Յորքի վերլուծաբանների կարծիքով՝ վարկային վարկանիշի բարձրացումը լավ ազդանշան է ներդրողներին՝ Թուրքիայի տնտեսությունում իրենց կապիտալ ներդրումների անվտանգության մասին: Անկարան նաև կարող է հուսալ, որ կստանա ավելի էժան միջազգային վարկեր:
