Սաակաշվիլիի կուսակցությունը խոչընդոտում է «Օկուպացված տարածքների մասին» օրենքում ուղղումներ կատարելուն
Грузия Online-ի փոխանցմամբ՝ երեկ Վրաստանի խորհրդարանի լիագումար նիստում ողջ օրը քննարկվել է «Օկուպացված տարածքների մասին» օրենքում փոփոխություններ կատարելու հարցը: Քննարկումները շարունակվելու են նաև այսօր, քանի որ երեկ գործը չի հասել քվեարկության:
«Միասնական ազգային շարժում» կուսակցության պատգամավորները կտրականապես դեմ են հանդես գալիս այդ օրենքում ուղղումներ կատարելուն և ձգձգում են հարցի քննարկումը: Նրանք բացեիբաց հայտարարել են, որ միտումնավոր են կիրառում այդ մարտավարությունը՝ օրինագծերի վերաբերյալ քննարկումները բարդացնելու համար:
Մասնավորապես, նրա բոլոր պատգամավորները, որոնք մասնակցում են նիստին, իրավունք ունեն հարց ուղղել, հարցը ճշգրտել զեկուցողից և ելույթ ունենալ: Օրինագիծն առաջին անգամ քննարկվել է մայիսի 2-ի նիստում:
Ներկայումս վրացական օրենսդրությամբ նախատեսված է քրեական պատասխանատվություն «Օկուպացված տարածքների մասին» օրենքի խախտման համար: Վրաստանի քրեական օրենսգրքի 322.1 հոդվածով նախատեսվում է օկուպացված տարածքներ ապօրինի այցելելու համար տուգանք՝ նվազագույնը 2000 լարի (մոտ 1200 դոլար) կամ էլ 2-4 տարվա ազատազրկում:
Իսկ առաջարկվող փոփոխությունները, որոնց հեղինակը Վերաինտեգրման նախարարի ապարատն է, օկուպացված տարածքներ ապօրինի այցելելու համար նախատեսում են 400 լարի տուգանք, իսկ կրկնվելու դեպքում՝ 8000 լարի տուգանք:
