Ամերիկացի կոնգրեսականների համար թողարկվել են «Ռուսական մաֆիա» անվանմամբ խաղաթղթեր (լուսանկարներ)
Newsru.com-ի փոխանցմամբ՝ ԱՄՆ-ում գործող Ռուսաստանի հետազոտությունների կենտրոնը թողարկել է «Ռուսական մաֆիա» անվանմամբ խաղաթղթերի կապուկ: Դրանցից յուրաքանչյուրում պատկերված է նախագծի հեղինակների կարծիքով՝ ռուսական կազմակերպված հանցավորության առավել ազդեցիկ ներկայացուցիչներից մեկը:
Այդ խաղաթղթերը նվիրելու են կոնգրեսականներին, հատուկ ծառայությունների աշխատակիցներին ու իրավապահներին, որոնք պետք է թշնամուն ճանաչեն դեմքով: Նախագծի հեղինակները կարծում են, որ իրենց խաղաթղթերը հնարավորություն կտան ավելի արդյունավետ պայքար մղել ռուսալեզու հանցագործների դեմ, որոնք իրենց ազդեցությունն ընդլայնում են ոչ միայն ԱՄՆ-ում, այլև՝ համայն աշխարհում:
Յուրաքանչյուր տարի «Ռուսական մաֆիա» խաղաթղթերի կապուկը կհամալրվի նոր դեմքերով և կվերատպագրվի: «Ռուսական մաֆիայի» տուզերն ունակ են խաթարել ամբողջական երկրների տնտեսությունը: Նշվում է, որ այս նախագիծը կարող է հարուցել միջազգային հնչեղությամբ սկանդալ:
