Իսրայելի բնակիչները վարչապետին հարկադրել են հրաժարվել օդանավում 138.000 դոլար արժողությամբ մահճակալից օգտվելուց
Բրիտանական The Daily Telegraph թերթի փոխանցմամբ՝ երբ Իսրայելի վարչապետ Բենիամին Նեթանյահուն ապրիլի 17-ին Թել Ավիվից ինքնաթիռով մեկնել է Լոնդոն, թռիչքի համար նրա ինքնաթիռում տեղադրվել է 138.000 դոլար արժողությամբ երկտեղանոց մահճակալ:
Թերթի տվյալներով՝ մահճակալը հատկացվել է դեպի Մեծ Բրիտանիա 5 ժամանոց թռիչքի համար, ուր Նեթանյահուն մասնակցել է Մեծ Բրիտանիայի նախկին վարչապետ Մարգարետ Թետչերի հուղարկավորությանը:
Այն բանից հետո, ինչ այս տեղեկատվությունը հայտնվել է իսրայելական ԶԼՄ-ներում, 10.000 իսրայելցի դուրս են եկել փողոցներ՝ ընդդեմ երկրի կառավարության կողմից տնտեսման կոշտ միջոցների:
Իսրայելի վարչապետի շրջապատում եղած աղբյուրը հայտնել է, որ Նեթանյահուն տեղյակ չի եղել մահճակալի արժեքի մասին. «Հենց որ դա հայտնի դարձավ, վարչապետն անմիջապես հրամայեց վերացնել այն իր հետագա եվրոպական չվերթների ժամանակ»:
