Իրանում առաջին կին թեկնածուն հայտ է ներկայացրել՝ նախագահական ընտրություններին մասնակցելու համար
Իրանական Fars լրատվական գործակալության փոխանցմամբ՝ Իրանում առաջին կին թեկնածուն հայտ է ներկայացրել՝ նախագահական ընտրություններին մասնակցելու համար: Խոսքը գնում է 46-ամյա Ռազիե Օմիդվարի մասին:
Վերջինս հայտարարել է, որ իր նպատակը երկրում առկա իրավիճակի ընդհանուր բարելավումն է և հասարակությանը ծառայելը: Եթե նա հաղթանակ տանի Իրանի նախագահական ընտրություններում, ապա կդառնա Իրանի Իսլամական Հանրապետության պատմության մեջ առաջին կին նախագահը:
Հիշեցնենք, որ երեկ Իրանում մեկնարկել է նախագահի թեկնածուների գրանցման գործընթացը և գրանցվել էր միանգամից 75 հայտ: Գրանցման գործընթացը պետք է տևի մինչև մայիսի 11-ը:
Սահմանադրության պահապանների խորհուրդը մայիսի 12-16-ին կդիտարկի բոլոր հայտերը՝ հաստատելու կամ մերժելու համար: Իրանում նախագահական ընտրությունները տեղի են ունենալու հունիսի 14-ին:
