ԱԺ տարածք ներխուժած անձի գործն ուղարկվեց դատարան

Մարտի 22-ին ՀՀ Ազգային Ժողովի ցանկապատ տարածք ապօրինի մուտք գործած Վրեժ  Գալստյանի գործն  ուղարկվել է  Երևանի Արաբկիր և Քանաքեռ-Զեյթուն  վարչական շրջանների ընդհանուր իրավասության դատարան`  բժշկական բնույթի հարկադրական միջոցներ կիրառելու  համար: Այս մասին տեղեկացնում է «Փաստինֆոն»:

Ըստ ՀՀ հատուկ քննչական ծառայությունում  հարուցած քրեական գործի նախաքննությամբ ձեռք բերված ապացույցների, անմեղսունակության վիճակում քրեական օրենսգրքով չթույլատրված արարք թույլ տված Արարատի մարզի Մասիս քաղաքի բնակիչը 2013թ. մարտի 22-ին` ժամը 14.50-ի սահմաններում, խախտելով պետական պահպանության կանոնակարգով սահմանված անցագրային ռեժիմը, ապօրինի մուտք է գործել հատուկ պահպանվող օբյեկտ հանդիսացող ՀՀ Ազգային Ժողովի ցանկապատ տարածք, չի ենթարկվել ապօրինի տեղաշարժը դադարեցնելու վերաբերյալ իշխանության ներկայացուցիչ հանդիսացող,  ՀՀ պետական պահպանության ծառայության ծառայողներ Արտաշես Գալստյանի և Վազգեն Հակոբյանի օրինական պահանջներին: Վրեժ Գալստյանն իր ապօրինի գործողությունները չի դադարեցրել   նաև Արտաշես Գալստյանի նախազգուշական կրակոցներ արձակելուց հետո և շարունակել է շարժվել ՀՀ Ազգային Ժողովի վարչական շենքի ուղղությամբ, իսկ ձեռքին եղած դանակով կյանքի և առողջության համար վտանգավոր բռնություն գործադրելու սպառնալիքներ տվել իրենց ծառայողական պարտականությունները կատարող իշխանության ներկայացուցիչներին: Վրեժ Գալստյանի ապօրինի տեղաշարժը կանխելու և նրան վնասազերծելու նպատակով ՀՀ պետական պահպանության ծառայության գնդի 2-րդ գումարտակի 1-ին վաշտի հրամանատարի տեղակալ Սահակ Սահակյանն իրեն ամրակցված  «ՊՄ» տեսակի ատրճանակից ևս մեկ նախազգուշական կրակոց է արձակել, սակայն Վրեժ Գալստյանը, կրկին չենթարկվելով իշխանության ներկայացուցիչների օրինական պահանջներին, դանակը ձեռքին կտրուկ շարժում է կատարել Սահակ Սահակյանի ուղղությամբ, ինչի պատճառով վերջինս իրեն ամրակցված ատրճանակից կրակոց է արձակել Վրեժ Գալստյանի ուղղությամբ` նրա ձախ ազդրի վերին երրորդականի շրջանում պատճառելով հրազենային միջանցիկ մարմնական վնասվածք:

Դեպքից անմիջապես հետո ՀՀ պետական պահպանության ծառայության աշխատակիցները կազմակերպել են Վրեժ Գալստյանի առաջին բուժօգնությունը, և նա տեղափոխվել է Երևանի թիվ 1 համալսարանական հիվանդանոց:

Դեպքի առթիվ 2013թ. մարտի 22-ին ՀՀ հատուկ քննչական ծառայությունում հարուցվել է քրեական գործ` ՀՀ քրեական օրենսգրքի 316-րդ հոդվածի 1-ին մասով,  մարտի 25-ին Վրեժ Գալստյանը ներգրավվել է որպես մեղադրյալ, և նրան մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով: Նույն օրը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի որոշմամբ նրա նկատմամբ որպես խափանման միջոց կիրառվել է կալանավորումը:

Նախաքննությամբ պարզվել է, որ Վրեժ Վանիկի Գալստյանը 2012թ. մայիսի 14-ից հաշվառված է Մասիսի պոլիկլինիկայի հոգեբուժական կաբինետում` «շիզոֆրենիա պարանոիդ ձև, աֆեկտիվ-զառանցական համախտանիշ» ախտորոշմամբ:

Ըստ  Վրեժ Գալստյանի վերաբերյալ ստացիոնար դատահոգեբուժական փորձաքննության եզրակացության,  քրեական օրենքով չթույլատրված արարքը կատարելու պահին Վրեժ Գալստյանը գտնվել է նշված հիվանդագին խանգարված վիճակում, արարքը կատարել է զառանցական ապրումների ազդեցության ներքո, որը զրկել է նրան իր գործողությունների վտանգավորությունը գիտակցելու և դրանք ղեկավարելու հնարավորությունից:

Նկատի ունենալով վերը շարադրվածը` նախաքննական մարմինը հարուցել է  բժշկական բնույթի հարկադրական միջոցներ կիրառելու վարույթ եւ ապրիլի 26-ից դատարանի որոշմամբ  Վրեժ Գալստյանը գտնվում է հոգեբուժական հիվանդանոցում, քանի որ նա  վտանգավոր է հասարակության համար։