Վրաստանը պաշտոնապես որոշեց մասնակցել Սոչիի օլիմպիական խաղերին
Ռուսական ИТАР-ТАСС լրատվական գործակալության փոխանցմամբ՝ Վրաստանի Ազգային օլիմպիական կոմիտեն (ԱՕԿ) այսօր պաշտոնապես որոշում է ընդունել մասնակցել 2014 թվականին Սոչիում կայանալիք օլիմպիական խաղերին:
Վրաստանի ԱՕԿ-ի նախագահ Լերի Խաբելովը հայտարարել է, որ այդ որոշումը միաձայն ընդունվել է իրենց այսօրվա նիստում՝ Օլիմպիական խարտիայի հիման վրա և ելնելով Միջազգային օլիմպիական շարժման և վրացական սպորտի շահերից: Բոլոր ֆեդերացիաների ղեկավարներն աջակցել են այդ որոշմանը:
Խաբելովը հավելել է, որ Սոչիի օլիմպիական խաղերին հյուրի կարգավիճակով ներկա է գտնվելու Վրաստանի վարչապետ Բիձինա Իվանիշվիլին, ով սրանից առաջ քանիցս հայտարարել է, որ Վրաստանը մտադիր չէ բոյկոտել Սոչիի օլիմպիական խաղերը:
