Կառավարությունը մերժում է «Ժառանգությանը»
ՀՀ կառավարությունը բացասական եզրակացություն է տվել է Հայաստանի Հանրապետության Ազգային ժողովի պատգամավորներ Ռուբիկ Հակոբյանի, Զարուհի Փոստանջյանի և Թևան Պողոսյանի` օրենսդրական նախաձեռնության կարգով ներկայացրած «Հայաստանի Հանրապետության ընտրական օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագծի (Պ-227-21.03.2013-ՊԻ-010/0) վերաբերյալ: Այդ եզրակացությունը կհաստատվի կառավարության վաղվա նիստում։
Նշենք, որ «Ժառանգության» պատգամավորների գլխավոր պահանջը բխում վերաբերում էր ընտրական օրենսգրքի այն դրույթին, որն արգելում է լուսանկարահանել կամ տեսանկարահանել ընտրողների ստորագրած ցուցակները։
Մասնավորապես, ՀՀ Ընտրական օրենսգրքի 11-րդ հոդվածի 1-ին մասի 2-րդ պարբերությունը նշում է, որ ընտրողների ստորագրած ցուցակները հրապարակման ենթակա չեն, դրանցից լուսապատճեններ չեն հանվում, դրանք չեն լուսանկարվում և տեսանկարահանվում:
Իսկ պատգամավորներն առաջարկում էին այն շարադրել նոր խմբագրությամբ. «Ընտրողների ստորագրած ցուցակները հրապարակվում են տեղամասային կենտրոնները փակվելուց անմիջապես հետո: Դրանք կարող են լուսապատճենվել, լուսանկարվել եւ տեսանկարահանվել»:
Կառավարությունը համարել է, որ ստորագրած ցուցակների նկարահանման արգելքի վերացումը խախտում է ընտրության գաղտնիության սկզբունքը։ Կառավարական իրավաբանները բավականին երկար ու բարձ ձևեկաերպումներով հիմնավորում են ներկայացրել, որին կարող եք ծանոթանալ այստեղ:
Նշենք, որ վերանալով իրավաբանական ձևակերպումներից և հիմնավորումներից՝ վերը նշված հարցը ունի շատ կարևոր նշանակություն։ Ստորագրած ցուցակների նկարահանումն ու հրապարակումը ահագին կդժվարացնի ընտրությունները կեղծելու գործը։ Այսինքն՝ եթե ընտրողը չի մասնակցել ընտրությանը, ապա ստորագրած ցուցակի հրապարակվելու դեպքում նա կարող է տեսնել՝ իր կամ հանրապետությունից բացակայող կամ մահացած ծանոթի փոխարեն հո ոմանք չե՞ն քվեարկել։ Իսկ նման «շռայլություն» իշխանություններն իրենց չեն կարող թույլ տալ։
