Ծառուկյանը չի մասնակցի Սերժ Սարգսյանի երդմնակալությանը
«Բարգավաճ Հայաստան» կուսակցության առաջնորդ Գագիկ Ծառուկյանը չի մասնակցի Հայաստանի նախագահ Սերժ Սարգսյանի երդմնակալության արարողությանը: Այս մասին «Ազատություն» ռադիոկայանին փոխանցեց նրա խոսնակ Իվետա Տոնոյանը` որպես պատճառ նշելով «Բարգավաճ Հայաստանի» նախագահի բացակայությունը երկրից:
Տոնոյանը հայտնել է նաև, որ Ծառուկյանը արտերկիր է մեկնել նախօրեին:
Այսօր տեղի է ունեցել ԲՀԿ նիստը,որտեղ ըստ ԱԺ ԲՀԿ խմբակցության քարտուղար Նաիրա Զոհրաբյանի՝ չի քննարկվել վաղը կայանալիք ինագուրացիային մասնակցել-չմասնակցելու հարցը: Ն. Զոհրաբյանը news.am-ին ասել է. «Մենք նման քննարկում չենք արել եւ նման քննարկում նախատեսված չէ, վաղը կերեւա»:
Հարցին, թե Գագիկ Ծառուկյանի այցը նախատեսվա՞ծ էր, թե՞ նա մեկնել է Սերժ Սարգսյանի երդմնակալության արարողությանը չմասնակցելու համար, ԲՀԿ խմբակցության քարտուղարը նշեց, որ «բացարձակապես ոչ, դա նախատեսված աշխատանքային այց էր արտերկիր»:
