Apple-ը պատրաստվում է թողարկել սեփական ջոյսթիկը
Լրատվամիջոցներում տեղեկություններ են հայտնվել, ըստ որոնց՝ Apple ընկերությունը պատրաստվում է իր սեփական խաղային վերահսկիչի (ջոյսթիկ) թողարկմանը և այս մասին իր գաղափարով անգամ կիսվել է մի քանի խաղային ընկերությունների հետ մասնագիտական համաժողովի ժամանակ, գրում է «Վեստին»:
Ինչպես նշում է Pocket Gamer-ը, չի բացառվում, որ սարքը կցուցադրվի արդեն մեկ ամսից:
Apple-ը դեռևս հրաժարվում է մեկնաբանել այս լուրը: Այդուամենայնիվ, լրագրողները հիշել են, որ ոչ վաղ անցյալում այս մասին տեղեկություններ էին հայտնվել մամուլում: Ավելին, 2008թ. ընկերությունը համապատասխան արտոնագիր է ձեռք բերել:
Հարկ է նշել, որ ներկայումս սմարթֆոնների և պլանշետների լայն տարածումը Apple-ին հնարավորություն կտան բազմաթիվ խաղային սարքեր վաճառել:
