Պատժամիջոցներն Իրանին չեն խանգարում ընդլայնել նավթի արտահանումը
Vesti.ru-ի փոխանցմամբ՝ Իրանն ընդլայնում է նավթի արտահանումը՝ չնայած ԱՄՆ-ի ու ԵՄ-ի սահմանած պատժամիջոցների: Նախօրեին չինական գերհեղուկանավը, որն ունակ է ամբարել 2 միլիոն բարել հում նավթ, դուրս է եկել Իրանի խոշորագույն արտահանման տերմինալից:
Դա չինական այդքան խոշոր լցանավի առաջին այցն է իրանական նավահանգիստ այն բանից հետո, ինչ նախորդ տարվա հուլիսին ԵՄ-ն արգելք դրեց Իրանից բեռների ապահովագրման վրա: Այդպիսով, Չինաստանը սկսում է վերստին գնել իրանական նավթ, ընդ որում գնման ծավալը կարող է ավելի մեծ լինել:
Հայտնի է դարձել նաև այն, որ Ճապոնիան փետրվարին իրանական նավթի ներկրումը հասցրել է մինչև 321.000 բարելի: Դա 16 տոկոսով ավելին է՝ համեմատած նախորդ տարվա փետրվարի հետ և հանդիսանում է ամենաբարձր ցուցանիշը՝ սկսած 2012 թվականի մարտից:
Չնայած իրանական ընկերությունները ստիպված են իրենց եկամուտների 10-30 տոկոսը ծախսել պատժամիջոցների շրջանցման վրա, այնուամենայնիվ դա նրանց հնարավորություն է տալիս հաջողությամբ գոյատևել ԱՄՆ-ի ու ԵՄ-ի կողմից ճնշումների պայմաններում:
