Դոլարի փոխարժեքը գերազանցեց 7 տարվա ռեկորդը
«ՆԱՍԴԱՔՕԷՄԷՔՍ Արմենիա» բորսայում այսօր՝ մարտի 27-ին, դոլարի միջին փոխարժեքը կազմել է 419.75 դրամ՝ երեկվա համեմատ թանկանալով 0.19%-ով կամ 0.8 դրամով։
Դոլարի բորսայական փոխարժեքը ռեկորդային է ոչ միայն ընթացիկ տարվա, այլև՝ նախորդ 7 տարիների կտրվածքով։ Ավելի ստույգ՝ պաշտոնական փոխարժեքը ավելի բարձր եղել է 2006 թվականի հունիսին։
Ուշագրավ է նաև այն, Կենտրոնական բանկը չի էլ ցանկանում միջամտել պրոցեսին։ Բորսայում վաճառվել է ընդհանուր առմամբ 900 հազար դոլար, այսինքն՝ ԿԲ-ն ինտերվենցիա (դոլարի առք կամ վաճառք) չի իրականացնում։ Ի դեպ, երեկ նույնպես բորսայում փոխարժեքը բարձրացել էր, իսկ բորսայում իրականացվել էր ընդամենը 700 հազար դոլարի առք և վաճառք։
Ավելացնենք նաև, որ կանխիկ արտարժույթի շուկայում դոլարն այս պահին գնվում է միջինը 418 դրամով, վաճառվում՝ 421 և ավելի բարձր գնով։
Առևտրային բանկերն այս պահին դոլարը գնում են միջինը 417 դրամով, վաճառում՝ 420 դրամով։
