«Վեցյակը» Ղազախստանում Իրանին նախապայման կներկայացնի ոսկու վաճառքի արգելքի մեղմացման համար
Բրիտանական Reuters լրատվական գործակալության փոխանցմամբ` «Վեցյակը» պատրաստ է Իրանին առաջարկել մեղմացնել ոսկի և այլ թանկարժեք մետաղներ Իրանին վաճառելն արգելող պատժամիջոցը, ինչի դիմաց իրանական կողմը պետք է համապատասխան քայլեր ձեռնարկի իր միջուկային ծրագրի ուղղությամբ: Այս մասին հայտնել են դիվանագիտական աղբյուրները:
Վերջիններիս պնդմամբ` տվյալ առաջարկն արվելու է փետրվարի 26-ին Ալմա Աթայում Իրանի ու «Վեցյակի» միջև անցկացվելիք բանակցային հերթական փուլի ժամանակ: Թեհրանից որպես պատասխան քայլ` ակնկալվում է «Ֆորդու» ստորգետնյա գործարանի փակումը, ուր իրականացվում է ուրանի հարստացում:
Հիշեցնենք, որ Իրանի արտգործնախարար Ալի Աքբար Սալեհին փետրվարի 12-ին Մոսկվայում լրագրողների հետ զրույցում հայտարարել է, որ Իրանը պատրաստ է գնալ բանակցություններում յուրաքանչյուր պայմանավորվածության, եթե մյուս մասնակիցները նույնպես ցանկություն հայտնեն կարգավորել այդ հարցը:
