Բաց նամակ` Երվանդ Զախարյանին
Կապանի «Կայուն զարգացում» հ/կ-ի նախագահ Արմեն Փարսադանյանը բաց նամակով դիմել է ՀՀ կառավարությանն առնթեր Անշարժ գույքի կադաստրի պետական կոմիտեի նախագահ Երվանդ Զախարյանին: Ա. Փարսադանյանը խնդրել է իրեն տրամադրել Սյունիքի մարզում 2012-2013թ-ի ընթացքում, պետական և համայնքային սեփականություն հանդիսացող հողերի վարձակալության և վաճառքի պայմանագրերի մասին ներքոնշյալ տեղեկատվությունը.
«Նշել վերոնշյալ ժամկետում, 5հա և այն գերազանցող պետական և համայնքային սեփականություն համարվող, վարձակալության և վաճառքի գործարքի օբյեկտ հանդիսացած յուրաքանչյուր հողամասի.
- Իրականացված գործարքի ամսաթիվը,
- Գործարքի տեսակը /վարձակալություն թե վաճառք/
- Վարձակալության ժամկետը, եթե գործարքը հանդիսանում է վարձակալություն
- Գործարքի օբյեկտ հանդիսացող հողամասի մակերեսը
- Գործարքի արժեքը
- Հողամասը պատկանող համայնքի անվանումը
- Գնորդի կամ վարձակալողի մասին հետևյալ տեղեկատվություն /Ֆիզիկական անձի դեպքում` անուն, ազգանուն, հայրանուն, բնակության վայր, գրանցման հասցե: Իրավաբանական անձի դեպքում` ընկերության անվանումը, գրանցման վայրը/
- Գործարքի օբյեկտ հանդիսացող հողամասի աշխարհագրական կոորդինատները»,- ասված է նամակում:
Հ/կ-ի նախագահը նաև պատրաստամակություն է հայտնել, որ անհրաժեշտության դեպքում օրենսդրությամբ սահմանված կարգով կարող է փոխհատուցել հիշյալ տեղեկատվության տրամադրման համար կատարված ծախսեր:
