Եվս մեկ հացադուլավոր թեկնածու
ՀՀ նախագահի թեկնածու, «Ազգային համաձայնություն» կուսակցության նախագահ Արամ Հարությունյանն ուղիղ ժամը 17:00-ին Կենտրոնական ընտրական հանձնաժողովի առջև էր, որտեղ նրան սպասում էին լրագրողները: Նախագահի թեկնածուն, ինչպես վաղօրոք հայտարարել էր, մեկօրյա հացադուլ է հայտարարելու ԿԸՀ-ի առջև, իսկ փետրվարի 8-ին ինքնաբացարկ է ներկայացնելու:
«Իմ պահանջն ուղղված է թեկնածուներին: Այս 24 ժամը ես թեկնածուներին եմ սպասում: Արմանի, Անդրիասի հետ ես խոսեցի, բայց իրենց բացատրություններն ինձ համար մի քիչ անհասկանալի են: Հայրիկյանին առողջություն եմ ցանկանում»,-հայտարարեց նախագահի թեկնածուն:
Արամ Հարությունյանը պատմեց, որ մինչ ԿԸՀ ներկայանալն ինքն այցելել է հացադուլ հայտարարած նախագահի թեկնածու Անդրիաս Ղուկասյանին և վերջինիս կոչ է արել դուրս գալ հացադուլից ու ինքնաբացարկ հայտնել:
«Քվեարկվելով՝ ինքն, ըստ էության, շինծու ընտրություններին մասնակցում է: Դրանից հետո միշտ կգտնվի մեկը, որ կասի՝ բա ինչո՞ւ մասնակցեցիր ընտրություններին»,- նշեց Արամ Հարությունյանը:
Նա կրկին շեշտեց, որ Հայաստանին պետք են նոր նախագահական ընտրություններ, որոնք մինչ առաջադրումը զերծ կլինեն ճնշումներից: Արամ Հարությունյանը հայտարարեց, որ ինքը պատրաստ է նաև նոր ընտրություններ նշանակվելու դեպքում չառաջադրվել: Արամ Հարությունյանն ընթերցեց նաև ԿԸՀ նախագահ Տիգրան Մուկուչյանին ուղղված ինքնաբացարկի դիմումը:
Մեկօրյա հացադուլ հայտարարած թեկնածուն վստահեցրեց, որ անբարենպաստ եղանակային պայմանները չեն կարող իրեն ետ պահել հացադուլից: Հարցին, թե վրան տեղադրելո՞ւ եք գիշերը, թե՞ ոչ, Արամ Հարությունյանը պատասխանեց, որ կհամարի՝ մի օր գլխին տանիք չկա:
Արամ Հարությունյանը համոզմունք հայտնեց, որ իրեն գիշերը միայնակ չեն թողնի, և շատ այցելուներ կունենա: Արամ Հարությունյանին քիչ անց այցելեց Հանրային խորհրդի անդամ, ԱԺԴ կուսակցության նախագահ Արշակ Սադոյանը և նրա կուսակից Կարեն Վարդանյանը:
