«Ժառանգություն»-ՀՅԴ հանդիպման ժամանակ թեկնածուի հարց չի քննարկվել
Քաղաքական կոնսուլտացիաների շրջանակում այսօր կայացել է «Ժառանգություն» կուսակցության և ՀՅԴ-ի ներկայացուցիչների հանդիպումը։ 168.am-ի հետ զրույցում «Ժառանգություն» կուսակցության փոխնախագահ Արմեն Մարտիրոսյանը հայտնեց, որ միջկուսակցական հանդիպումն անցել է լավ մթնոլորտում:
Արմեն Մարտիրոսյանի խոսքով՝ ՀԴՅ-ի կողմից ներկայացված 7 կետերի մեծ մասն ընդունելի են իրենց համար, բայց կան նաև այնպիսիք, որոնց շուրջ կուսակցությունները տարբեր կարծիքներ ունեն: «Ժառանգության» փոխնախագահն ընդգծեց, որ հանդիպման ժամանակ միասնական թեկնածուի հարց չի քննարկվել:
Ա. Մարտիրոսյանը չբացառեց, որ հետագայում ևս մեկ անգամ իրենք կհանդիպեն ՀՅԴ-ի հետ, սակայն, ըստ նրա՝ այսօր նման որոշում չի կայացվել:
Նշենք, որ «Ժառանգության» գրասենյակում տեղի ունեցած հանդիպմանը ներկա են եղել ՀՅԴ-ից Արմեն Ռուստամյանը, Աղվան Վարդանյանը, Արսեն Համբարձումյանը, իսկ «Ժառանգությունից»՝ Արմեն Մարտիրոսյանը և մամուլի խոսնակ Հովսեփ Խուրշուդյանը։
