Ի՞նչ է իրականում ասել վարչապետը

«Կարծում եմ` անպարկեշտ կեցվածք է խեղաթյուրել վարչապետի խոսքը և ներկայացնել բաներ, որ վարչապետը չի ասել»,- ըստ news.am-ի, այսօր ուսանողների հետ հանդիպման ժամանակ ասել է Ազգային ժողովի ՀՀԿ խմբակցության պատգամավոր Գագիկ Մինասյանը։

Խոսքը վերաբերում էր լրատվամիջոցներում տարածված տեղեկություններին, որ Հայաստանի վարչապետ Տիգրան Սարգսյանը նոյեմբերի 16-ին Հայաստանի պետական տնտեսագիտական համալսարանում ուսանողների հետ հանդիպմանն ասել է, թե անապահով ընտանիքների աշխատունակ անձինք նախընտրում են ստանալ 30-50 հազար դրամ նպաստ, քան աշխատել ու ստանալ 100-120 հազար դրամ աշխատավարձ:

Գ. Մինասյանը հավաստիացրել է, որ Տիգրան Սարգսյանը նման բան չի ասել։ «Իհա՛րկե ոչ, ես իսկապես ցավում եմ այդ լրատվամիջոցի համար: Պարկեշտությունը ենթադրում էր նախ՝ նայել Կառավարության կայքը, որտեղ դրված է, թե ինչ է ասել վարչապետը Տնտեսագիտական համալսարանում: Կարծում եմ` անպարկեշտ կեցվածք է՝ խեղաթյուրել վարչապետի խոսքը և ներկայացնել բաներ, որ վարչապետը չի ասել»,- ասել է նա։

Ստորև մեջբերում ենք Կառավարության պաշտոնական կայքի հաղորդագրության համապատասխան հատվածը։

«  «Վարչապետի խոսքով՝ հաջորդ խնդիրը սոցիալապես խոցելի ընտանիքների աշխատունակ անձանց աշխատանքով ապահովելն է: Կառավարության ղեկավարը նշել է, որ այս առումով բարդ հոգեբանական իրավիճակ է ստեղծվել. անապահով ընտանիքների աշխատունակ անձինք պատրաստ չեն աշխատել, չնայած որ ներկայիս 30-50 հազար դրամ սոցիալական նպաստի դիմաց կկարողանան վաստակել 100-120 հազար դրամ: «Պետք է հաղթահարենք այս հոգեբանական բարդույթը, որպեսզի մարդն իր աշխատանքով ապահովի իր ընտանիքի կենսունակությունը»,– նշել է գործադիրի ղեկավարը»:

Ստացվում է, որ «պատրաստ չեն աշխատել» արտահայտությունը կարելի է հասկանալ ամեն կերպ, բացի «չեն ցանկանում աշխատել» տարբերակից։ Իրոք որ, մեր պետական այրերի մտածելակերպը խիստ յուրօրինակ է։