Երկքաղաքացիները կարող են օգտվել պոլիկլինիկաներից
ՀՀ երկքաղաքացիություն ստացած անձինք կարո՞ղ են դիմել, գրանցվել և օգտվել Հայաստանի պոլիկլինիկաներում մատուցվող անվճար ծառայություններից: Պարզվում է՝ կարող են:
«ՀՀ կառավարության 2006 թ. որոշման համաձայն՝ երկքաղաքացիություն ստացած անձիք, ինչպես նաև ՀՀ քաղաքացիները, իրենց ցանկությամբ կարող են դիմել, գրանցվել առողջության առաջնային պահպանման ծառայություններ մատուցող հաստատություններում` պոլիկլինիկաներում և օգտվել անվճար մատուցվող ծառայություններից»,- տեղեկացրեց առողջապահության նախարարության առողջապահական ծրագրերի և որակի վարչության առողջապահական ծրագրերի բաժնի պետ Ռուզաննա Յուզբաշյանը:
Նույն օրենքի համաձայն, ՀՀ-ում փախստականի և ապաստան հայցողի կարգավիճակ ունեցող անձինք ևս իրավունք ունեն գրանցվել պոլիկլինիկաներում և անվճար օգտվել նրանց մատուցած ծառայություններից:
«Պոլիկլինիկայում գրանցվելու համար ՀՀ քաղաքացիները և երկքաղաքացիություն ստացած անձինք պետք է ներկայացնեն իրենց անձնագիրը, իսկ մինչև 16 տարեկան երեխաների համար` ծննդյան վկայականը:
Սոցիալապես անապահով կամ հատուկ խմբերին պատկանելու դեպքում, պոլիկլինիկայում գրանցվելիս անհրաժեշտ է ներկայացնել նաև այդ փաստը հավաստող փաստաթուղթը:
Բացի այդ, օտարերկրացիները և քաղաքացիություն չունեցող անձինք նույնպես կարող են գրանցվել իրենց կողմից ընտրված պոլիկլինիկայում՝ ներկայացնելով անձը հաստատող փաստաթուղթը և դրա պատճենը»,- ասաց առողջապահության նախարարության առողջապահական ծրագրերի բաժնի պետը:
«Փաստինֆո»
