Լադաները կթանկանա՞ն

168.am-ն «ԱվտոՎազ» ընկերության հայաստանյան ներկայացուցչությունից գների հնարավոր փոփոխության վերաբերյալ պարզաբանում է խնդրել, քանի որ, ըստ «Կոմերսանտի», «ԱվտոՎազը» 2012 թվականի առաջին կիսամյակի ընթացքում թանկացրել է մեքենաների գները: Պատճառը մեքենաների վաճառքի ծավալների անկումն է՝ 18,5%-ով: Վաճառքի ծավալների անկումը բերել է արտադրական վնասների, ինչի արդյունքում էլ գները թանկացել են: Ամենից շատ, ընդհանուր առմամբ, թանկացրել են Lada Chevrolet-ները: Գների թանկացման մասին տեղեկությունները ամփոփ ներկայացված են «ԱվտոՎազ» ընկերության անալիտիկ զեկույցում: Այդ փաստաթղթի համաձայն, Լադա-Սամարա ավտոմեքենան հունվար-հունիս ամիսներին թանկացել է 12,7%-ով, Լադա2107-ը՝ 9%-ով, Պրիորան՝ 6,3%-ով, Կալինան՝ 4,7%-ով:

Վերջին տվյալների համաձայն, «ԱվտոՎազ» ընկերության մեքենաների մասնաբաժինը ռուսաստանյան շուկայում կազմում է 18,7%, ինչը 6,2 տոկոսային կետով ավելի քիչ է, քան անցյալ տարվա նույն ժամանակահատվածում: Շուկայի մասնաբաժինը դրամական արտահայտմամբ նույնպես նվազել է 5,5%-ով: Ինչպես հայտնում է «Կոմերսանտը»՝ «ԱվտոՎազը»  զիջում է իր դիրքերն արտասահմանյան մեքենաներին, որոնց մասնաբաժինը շուկայում կազմում է շուրջ 80%, իսկ արժեքային արտահայտմամբ՝ 91,6%:
«ԱվտոՎազ» ընկերության հայաստանյան ներկայացուցչությունից 168.am-ի այն հարցին, թե արդյո՞ք Հայաստանում գործող գնային քաղաքականությունը փոփոխման է ենթարկվել, ընկերության ներկայացուցիչը պատասխանեց. «Այն բոլոր մեքենաները, որոնք կան մեր սրահում, վաճառվելու են նույն գներով, և գները փոփոխության չեն ենթարկվելու: Իսկ թե որքանո՞վ մենք կներկրենք մեքենաների նոր խմբաքանակը սեպտեմբերի կեսերին, ցույց կտա ժամանակը: Մենք ռուսաստանյան ռուբլով ենք աշխատում իրենց հետ, և որքանով որ իրենք մեզ կվաճառեն մեքենաները, այդ համամասնությամբ էլ կվաճառվեն այստեղ: Օրինակ, Լադա-Նիվան մեր սրահում վաճառվում է 5,700,000 դրամով, իսկ որքա՞ն կլինի նոր գինը՝ չգիտենք: Եթե թանկացում լինի, ապա մեզ մոտ էլ գինը կբարձրանա, եթե ոչ՝ ոչ»: Հիշեցնենք, որ 168.am-ը դեռ հուլիսի սկզբին անդրադարձել էր Լադա մեքենաների թանկացման թեմային՝ կանխատեսելով, որ հայաստանյան շուկայում նույնպես հնարավոր են գնային փոփոխություններ։