Մինասի «Հայկական հովվերգություն» որմնանկարը վտանգված է. Արման Ավետիսյան

Լրագրողների «Ասպարեզ» ակումբը ստացել է «Մինաս Ավետիսյան» բարեգործական հիմնադրամի նախագահ Արման Ավետիսյանի նամակի պատճենը ուղղված Շիրակի մարզպետի տեղակալ Ս.Պետրոսյանին, այն մասին, որ Գյումրու քաղաքապետարանը չի կատարում Մինաս Ավետիսյանի «Հայկական հովվերգություն» մեծածավալ որմնանկարի վերականգնման համար հիմնադրամի հետ կնքված պայմանագրային պարտավորությունների մի մասը, եւ այդ պատճառով այդ որմնանկարի փրկությունը վտանգված է:

Նամակում ասվում է, որ քաղաքապետարանը բացի վերականգնող կազմակերպությանը վճարելու պարտավորությունը, ստանձնել էր մի շարք աշխատանքների կատարման պարտավորություն, որոնք չի կատարում, կամ թերի է կատարում, ինչպես օրինակ շինարարական աշխատանքները, ջրամատակարարումը, կապի եւ համացանցի մատակարարումը, բեռնափոխադրումը եւ բարձումը, տպագրությունը եւ թարգմանչական ծառայությունները, տրանսպորտային ծախսերը, լուսանկարչական ծախսերը, Հայաստանում ձեռք բերված նյութերի եւ պարագաների ծախսի փակումը, վերականգնողների կեցության ծախսերը եւ այլն: Հիմնադրամը այս աշխատանքների թերակատարումը գնահատում է 13 մլն դրամի չափ, եւ հայտնում է, որ այդ աշխատանքները ինքն է կատարել ու կատարում:

Բացի այդ, ըստ հիմնադրամի նախագահի նամակի, Գյումրու քաղաքապետարանը նախահաշվում հիմնադրամին վերապահված ժամանակացույցով նախատեսվածից պակաս է վճարել եւս 13 մլն դրամ:

«Այսպիսով, ազգային արժեք ներկայացնող որմնանկարի վերականգնումը, որը ամբողջությամբ անջատված է պատից եւ փռված է գետնին, ունի կոնկրետ տեխնոլոգիական պրոցեսի ժամկետ եւ ժամկետի խախտումը կհանգեցնի հուշարձանի կորստի, ուստի հիմնադրամը խնդրում է Ձեր միջնորդությունը ՀՀ կառավարությանը` անհապաղ լուծում տալու վերը նշված խնդրին»,-ասվում է նամակում:

Լրագրողների «Ասպարեզ» ակումբը այս նամակում բերված հանգամանքների վերաբերյալ Գյումրու քաղաքապետարանի պարզաբանումները կներկայացնի հաջորդիվ:

Ստորև՝ հիշյալ նամակի լուսապատճենը.