Հայ-ռուսական միջկառավարական հանձնաժողովի առաջին նիստը կկայանա աշնանը
Հայ-ռուսական միջկառավարական հանձնաժողովը ձևավորվել է և առաջին նիստը կանցկացնի այս տարվա աշնանը: Այդ մասին օգոստոսի 8-ին՝ ՀՀ նախագահ Սերժ Սարգսյանի հետ հանդիպման ժամանակ, հայտարարել է ՌԴ նախագահ Վլադիմիր Պուտինը:
Սակայն, մեր ունեցած տեղեկությունների համաձայն, հուլիսի 30-31-ը ՀՀ էկոնոմիկայի նախարարությունում կայացել է Հայաստանի Հանրապետության և Ռուսաստանի Դաշնության միջև մինչև 2020թ. զարգացման ծրագրի մշակման աշխատանքային խմբի հանդիպումը, որի ընթացքում որոշվել է համապատասխան ծրագրային փաթեթներ ուղարկել նախարարություններին` ծրագիրն իրականացնելու նպատակով: Ծրագրային փաթեթները համապատասխան նախարարություններին պետք է ուղարկեր ՀՀ էկոնոմիկայի նախարարությունը:
Ի պատասխան 168.am-ի այն հարցերին, թե արդյո՞ք փաթեթներն ուղարկվել են, և ե՞րբ է նախանշվում ծրագրի սկիզբը, Էկոնոմիկայի նախարարության լրատվական ծառայությունից հաստատեցին, որ ծրագրային փաթեթները դեռևս կազմվում են, սակայն որոշ գերատեսչությունների արդեն ուղարկվել են: Ֆինանսների նախարարության լրատվական ծառայությունը հաստատեց ծրագրային փաթեթ ստանալու փաստը, սակայն ղեկավարության արձակուրդում գտնվելու պատճառով՝ որևէ մանրամասն տեղեկություն տալ չկարողացան:
Հստակություն չկա նաև 2020-ի հանձնաժողովի հայաստանյան ղեկավարի հարցում։ Էկոնոմիկայի նախարարությունից 168.am-ին փոխանցեցին, որ աշխատանքները դեռևս չեն ավարտվել, և ամենը դեռ քննարկման փուլում է: Սակայն, ինչպես փաստեց լրատվական ծառայությունը, հանձնաժողովի կազմում ներկայացուցիչներ կլինեն բոլոր ոլորտների գերատեսչություններից: Հիշեցնենք, որ ըստ ՌԴ նախագահ Վ. Պուտինի խոսքերի՝ ռուսական կողմից հանձնաժողովը կգլխավորի ՌԴ Տրանսպորտի նախարար Մաքսիմ Սոկոլովը։
