Ստեփանակերտում շահագործման կհանձնվի նոր հանրապետական հիվանդանոցը
Ստեփանակերտի նոր հանրապետական հիվանդանոցի շենքը շահագործման կհանձնվի մինչև տարեվերջ: Շինարարությունն ուկահավորումն իրականացնում է «Տաշիր» բարեգործական հիմնադրամը: 2011 թվականին մեկնարկած շինարարական աշխատանքների համար հիմնադրամը հատկացրել է 5.290 մլն դրամ։
Հինգ հարկանի շենքում կտեղակայվի հոսպիտալը, հիվանդների ընդունելության սրահը, շտապ օգնության կայանը, ծրագրային հեմոդիալիզի բաժինը, թերապևտիկ, վիրահատական, վերակենդանացման և ինտենսիվ թերապիայի, ինչպես նաև VIP բաժանմունքները։ Հիվանդանոցի նոր շենքը, որը գտնվում է Բաղրամյան փողոցում, համապատասխանելու է միջազգային բոլոր չափանիշներին։
Բացի այդ, առաջիկայում «Տաշիր» բարեգործական հիմնադրամը կանցկացնի հոգաբարձուների խորհրդի նիստ, որի ընթացքում կհաստատվի առաջիկա կարճաժամկետ ծրագրերի բյուջեն: Ծրագրերում կրկին ներառվելու է բուժհաստատությունների շենքերի նորոգումը: Այս մասին news.am-ին ասել է Կարեն Կարապետյանի գրասենյակի ղեկավար՝ Արտակ Ճաղարյանը:
Նրա խոսքով` գրեթե ավարտին են հասցվել հունիսի 8-ին տեղի է ունեցած «Տաշիր» բարեգործական հիմնադրամի հոգաբարձուների խորհրդի նիստում հաստատված կարճաժամկետ ծրագրերը, որոնց բյուջեն՝ 400-600 հազար դոլար է:
Հիշեցնենք, որ հիմնադրամը նաև պարգևատրումներ է իրականացրել։ Մասնավորապես, մրցանակներ են ստացել «Տաշիր» բարեգործական հիմնադրամի և «Պահանջում ենք գիտության ֆինանսավորման ավելացում» ֆեյսբուքյան նախաձեռնության կողմից հայտարարված գիտական լրագրության և առավելագույն հղում ունեցող գիտնականների մրցույթների հաղթողները: Արդեն անցկացվել է երկու մրցանակաբաշխություն, պարգևարտվել են գիտական թեմայով գրող 11 լրագրող:
Ա. Ճաղարյանը տեղեկացրեց, որ լրագրողների մրցանակաբաշխությունը զուգորդվել է առավելագույն հղում ունեցող հայաստանցի 100 գիտնականների մրցանակաբաշխության հետ եւ բոլոր մրցանակակիրներին տրվել են ֆինանսական պարգեւավճարներ։
Այնուհետ 300 հարյուր հազարական դրամի բանկային քարտեր են տրամադրվել Հայաստանի այն վեց մանկատներին, որոնք այս տարի ունեցել են շրջանավարտներ: Ընդհանուր առմամբ` բանկային քարտեր են ստացել 30 շրջանավարտներ:
Սեպտեմբերի 2-ին Վանաձորում կկայանա Լոռու մարզից Հայաստանի պետական բուհերում գերազանց սովորող ուսանողների պարգեւատրման արարողությունը: Ըստ. Ա. Ճաղարյանի` ուսման բարձր առաջադիմության համար 400 ուսանող կպարգեւատրվի հիմնադրամի կողմից:
Նշենք, որ «Տաշիր» բարեգործական հիմնադրամը պատկանում է Սամվել և Կարեն Կարապետյան եղբայրներին:
