ՀՀԿ-ն դրական է գնահատում անցնող քաղաքական տարին
Հայաստանի Հանրապետական կուսակցությունն ընդհանուր առմամբ դրական է գնահատում անցնող քաղաքական տարին: ՀՀԿ ԳՄ նիստից հետո լրագրողների հետ հանդիպմանն այս մասին ասաց ՀՀԿ խոսնակ, ՀՀ ԱԺ փոխնախագահ Էդուարդ Շարմազանովը: «Նախ մենք անցկացրեցինք շատ դրական խորհրդարանական ընտրություններ, որոնք ստացան միջազգային կազմակերպությունների և միջազգային դիտորդական առաքելությունների բացարձակ դրական վերաբերմունքը: Ավելին՝ մենք ունենք կայուն քաղաքական վիճակ, որն ամենաանհրաժեշտ գործոններից մեկն է թե տնտեսական աճի, թե առհասարակ զարգացման համար»,- ընդգծեց Շարմազանովը:
Նա հավելեց, որ Հայաստանի Հանրապետությունը գնում է հստակ ժողովրդավարացման ճանապարհով: «Դրա մասին է վկայում նոյեմբերի 24-ին Հայաստանի և Եվրոպական Միության միջև համաձայնագրի ստորագրումը, ինչպես նաև մենք կարողացանք լուրջ քայլեր ձեռնարկել մեր անվտանգության ապահովման, բանակի պաշտպանունակության բարձրացման, արտաքին մարտահրավերներին դիմակայելու ուղղությամբ: Կարողացանք որոշակի դրական տեղաշարժեր ապահովել թե արցախյան հիմնախնդրի, թե Հայոց ցեղասպանության միջազգային ճանաչման հարցում»,- նշեց ՀՀ Ազգային ժողովի փոխնախագահը:
