Կատալոնիայի անկախության կողմնակիցները տոնում են ընտրություններում տարած հաղթանակը
![](https://168.am/wp-content/uploads/2017/12/917102.jpg)
Կատալոնիայի անկախության կողմնակիցները, որոնք մտնում են Կատալոնիայի ազգային ասամբլեայի կազմի մեջ, տարածաշրջանային խորհրդարանի ընտրությունների արդյունքներն ընդունել են ցնծությամբ, դիսկոտեկով եւ խամոնի ու պանրի խորտիկներով՝ գինով ու գարեջրով, տեղեկացնում է ՌԻԱ Նովոստիին:
Նախնական տվյալներով՝ երեք կուսակցություններ, որոնք հանդես են գալիս Իսպանիայից Կատալոնիայի դուրս գալու օգտին, Կատալոնիայի խորհրդարանում ստանում են 135 տեղից 70-ը: Անկախության կողմնակիցները պարում են ազգային պարեր, վանկարկում կարգախոսներ ի պաշտպանություն Կատալոնիայի նախկին ղեկավար Կառլես Պուչդեմոնի եւ միմյանց շնորհավորում են հաղթանակի առթիվ:
«Կլինեն ցույցեր: Եթե նույնիսկ կրկին (Մադրիդից) ոստիկանություն ժամանի, ապա մենք կգործենք առաջվա պես՝ նույն ժողովրդավարական, խաղաղ ճանապարհով: Մենք հուսով ենք, որ Իսպանիայի իշխանությունները կսթափվեն եւ կվերականգնեն մեր նախագահի իրավունքները եւ ազատ կարձակեն բանտերում նստածներին, մենք պայքարելու ենք դրա համար»,- հավաստիացրել է Կատալոնիայի ազգային ասամբլեայի փոխնախագահ Ագուստի Ալկոբերոն: