Պուչդեմոնը պահանջել է ազատ արձակել ձերբակալված կատալոնացի բոլոր քաղաքական գործիչներին
Կատալոնիայի ղեկավար Կառլես Պուչդեմոնը ժեներալիտետի (կառավարության) անդամների ձերբակալումը համարել է «լուրջ սխալ եւ ոտնձգություն ժողովրդավարության դեմ» եւ պահանջել է ազատ արձակել իր ստորադրյալներին: Այս մասին նա հայտարարել է TV3 հեռուստաալիքի եթերում՝ գտնվելով Բելգիայում:
Նոյեմբերի 2-ին ավելի վաղ Իսպանիայում դատավորը կարգադրել է մինչեւ գործի ըստ էության քննությունը կալանքի տակ վերցնել Կատալոնիայի ժեներալիտետի ութ նախկին անդամների: Պուչդեմոնն ինքը եւ կատալոնաց եւս մի քանի քաղաքական գործիչներ չեն վերադարձել Բրյուսելից, ուր մեկնել էին, եւ չեն ներկայացել դատական նիստին:
«Որպես (ժեներալիտետի) օրինական նախագահ՝ ես պահանջում եմ ազատ արձակել դրա խորհրդականներին»,- հայտարարել է Պուչդեմոնը Կատալոնիայի TV3 հեռուստաալիքի եթերում: Նախկին վարչապետը կատալոնացի քաղաքական գործիչների ձերբակալումները որակել է «ծանրագույն ոտնձգություն ժողովրդավարության դեմ եւ հարված տարածաշրջանում դեկտեմբերին կայանալիք խորհրդարանական ընտրություններին»:
Պուչդեմոնի փաստաբան Պոլ Բեկարն ավելի ուշ Բելգիայի RTBF հեռուստաալիքին հայտնել է, որ իր պաշտպանյալը չի պլանավորում թաքնվել եվրոպական կալանագրից եւ ենթարկվել այդ հարցով Բելգիայի արդարադատության վճռին: Ըստ որում, ինչպես ճշտում է ՌԻԱ Նովոստի գործակալությունը, Կատալոնիայի ղեկավարի վերաբերյալ որոշում դեռեւս չի ընդունվել. Բրյուսելը կարող է հրաժարվել Մադրիդի տված կալանագրի կատարումից, եթե համարի, որ խոսքը վերաբերում է մարդու հիմնարար իրավունքների խախտումներին:
Կատալոնիայի անկախության հազարավոր կողմնակիցներ նոյեմբերի 2-ի երեկոյան տարածաշրջանի խորհրդարանի շենքի մոտ բողոքի հանրահավաքի էին դուրս եկել Իսպանիայի իշխանությունների գործողությունների դեմ: Հանրահավաքի մասնակիցները պահանջել են կալանքից ազատ արձակել կատալոնացի քաղաքական գործիչներին:
