Չինաստանում ամենահանրաճանաչ բլոգերուհին տարեկան վաստակում է շուրջ 450 հազար դոլար
Չինաստանում ամենահանրաճանաչ բլոգերուհին՝ Լելե Տաոն, որը մասնագիտացած է բազմաժամ ուղիղ եթերների բնագավառում, պատմել է, որ միջին հաշվով տարեկան վաստակում է շուրջ 448 հազար դոլար: Այս մասին հայտնել է The Independent-ը:
Հրատարակությունը նշում է, որ աղջիկը համարվում է երկրի ամենաբարձր վարձատրվող բլոգերը: Սովորաբար Համացանցի 24-ամյա հռչակավոր անձը մի քանի ժամ Է անցկացնում խցիկի մոտ և կա՛մ երգում է, կա՛մ պարում բաժանորդների աչքի առաջ: Նրա խոսքով՝ ուղիղ եթերին ինքը պատրաստվում է շուրջ երեք ժամ, իսկ բուն հեռարձակումները տեւում են շուրջ ինը ժամ:
Տաոն խոստովանել է, որ ոչ մի անգամ իր բազմամիլիոնանոց լսարանի առջև չի հայտնվել առանց դիմահարդարման, որովհետև մշտապես մրցակցություն է զգում մյուս բլոգեր-աղջիկների կողմից: «Ես գիտեմ, որ մյուսներն ավելի գեղեցիկ ու ավելի լավն են ինձնից, և այդ պատճառով էլ ես պետք է ավելի շատ աշխատեմ, որպեսզի լսարան հավաքեմ»,- նշել է չինուհին:
Աղջիկն ինտերնետ-լսարանի առջեւ ելույթ է ունենում 18 տարեկանից: Նա համագործակցում է գործակալության հետ, ուստի հարկադրված է կատարել գործընկերների բազմաթիվ պահանջները: Նաև հայտնի է, որ եկամուտների մի մասը գնում է գործակալությանը:
iResearch ընկերության տվյալներով՝ Չինաստանում ուղիղ հեռարձակումների շուկան 2016 թվականին գնահատվում է երեք միլիարդ դոլար: Այս ցուցանիշը 180 տոկոսով բարձր է, քան 2015 թվականին:
