Մանրամասներ՝ Մոսկվայի մարզային դատարանում տեղի ունեցած հրաձգությունից
GTA ավազակախմբի հինգ մասնակիցներ զինաթափել են պահակախմբին եւ կրակ բացել Մոսկվայի մարզային դատարանում: Հինգ ավազակներից երեքը ոչնչացված են, երկուսը՝ զինաթափված ու կալանավորված: Այդ մասին ՏԱՍՍ-ին հայտնել է իրավապահ մարմինների մի աղբյուր:
«Հինգ կրակողներից երեքը ոչնչացված են, երկուսը՝ զինաթափված ու կալանավորված»,-ասել է նա: Ինչպես հայտնել է գործակալության զրուցակիցը, մեղադրյալները փորձել են պատանդներ վերցնել:
Ինչպես հայտնել է փաստաբան Սոֆյա Ռուբասկայան, որը միջադեպի պահին գտնվում էր շենքում, հրաձգության հետեւանքով վիրավորվել են մի կին պրիստավ եւ պահակախմբի մի աշխատակից: «Մենք գտնվում էինք այլ շենքում, երբ կրակոցներ լսեցինք: Ընդհանուր առմամբ կատարվել է ավելի քան քսան կրակոց, մեզ սկսեցին տարհանել: Ես տեսա մի կին պրիստավի, որը վիրավորված էր, նրա դեմքն արյան մեջ էր: Նաեւ հետո ասացին, որ վիրավորվել է պահակախմբի մի աշխատակից»,-ասել է նա:
Մոսկվայի մարզի առողջապահության նախարարության մամուլի ծառայությունում հայտնել են, որ Մոսկվայի մարզային դատարանի շենքից հոսպիտալացվել է երկու մարդ: «Մոսկվայի մարզային դատարանի շենքից հիվանդանոց են տեղափոխվել երկու տուժածներ՝ 45-ամյա մի տղամարդ եւ 40-ամյա մի կին»,-ասել է մամուլի ծառայության աշխատակիցը: Ընդսմին նա ընդգծել է, որ տուժածները հրազենային վերքեր չունեն: «Տուժածները միջին աստիճանի ծանրության վիճակում են»,-ճշտել է գործակալության զրուցակիցը:
Մինչդեռ իրավապահ մարմինների աղբյուրը հայտարարել է, որ արտակարգ պատահարի հետեւանքով տուժել է երեք մարդ:
Հրաձգության հետեւանքով տուժածների թվաքանակը հասել է երեքի, նրանցից երկուսը հոսպիտալացված են»,-ասել է աղբյուրը:
Ինչպես ՏԱՍՍ-ին հայտնել է ՆԳ նախարարության Մոսկվայի գլխավոր վարչության մամուլի ծառայության ղեկավար Տատյանա Պետրովան, վերքեր են ստացել Ռոսգվարդիայի մի աշխատակից եւ երկու ոստիկան:
Ներկայում Մոսկվայի մարզային դատարանի աշխատանքը վերականվնված է, ինչի մասին հայտնել է դատարանի մամուլի քարտուղար Նատալյա Օսիպովան: Նրա խոսքով՝ միջադեպի ընթացքում հիմնարկության աշխատակիցների ոչ ոք չի տուժել:
