Մանչեսթրում ահաբեկչության գործով բերման ենթարկվածների թիվը հասել է ութի
Մեծ Բրիտանիայի իրավապահ մարմինները եւս երկու մարդու են բերման ենթարկել մայիսի 22-ին Մանչեսթրում կատարված ահաբեկչության հետաքննության շրջանակներում: Այդ մասին Twitter-ում հայտնել է Մեծ Մանչեսթրի ոստիկանությունը:
«Այսօր առավոտյան մենք խուզարկություններ ենք անցկացրել Վիթինգթոնի շրջանում, ձերբակալվել է մի տղամարդ: Հետաքննության կապակցությամբ մեկ ուրիշ տղամարդ նույնպես այսօր առավոտյան ձերբակալվել է Մանչեսթրում»,-հայտնել է ոստիկանությունը:
Ավելի վաղ իրավապահները Twitter-ում տեղեկացրել էին, որ «Մանչեսթր Արենա»ում կատարված ահաբեկչության կապակցությամբ բերման ենթարկված կինն ազատ Է արձակվել առանց նրա նկատմամբ մեղադրանքներ ներկայացնելու: Այսպիսով, կալանքի տակ գտնվող կասկածյալների ընդհանուր թիվը հասել է ութի:
Քննիչները գտնում են, որ ահաբեկչական գործողությունը կազմակերպվել է հանցավոր խմբի կողմից: Ավելի վաղ հայտնի է դարձել ենթադրյալ մահապարտահաբեկչի՝ Սալման Աբեդիի ավագ եղբոր՝ Իսմայիլ Աբեդիի ձերբակալման մասին, որին բռնել են Մանչեսթրի հարավում, ինչպես նաեւ Լիբիայում Աբեդիի հոր եւ կրտսեր եղբոր ձերբակալման մասին:
Մանչեսթրում ահաբեկչական գործողությունը տեղի է ունեցել մայիսի 22-ի երեկոյան ամերիկացի երգչուհի Արիանա Գրանդեի համերգի ավարտին: Մահապարտն ինքնաշեն ռումբը պայթեցրել է «Մանչեսթր-Արենա» համալիրի ճեմասրահում:
Վերջին տվյալներով՝ «ՄանչեսթրԱրենայում» պայթյունի հետեւանքով զոհվել է 22 մարդ, այդ թվում՝ 12 երեխա, 64 հոգի գտնվում է հիվանդանոցներում, 9 մարդ նախկինի պես համարվում է անհայտ կորած: Պայթյունի պատասխանատվությունն ստանձնել է «Իսլամական պետություն» ծայրահեղական խմբավորումը, հաղորդել է ՏԱՍՍ-ը:
