Ինչո՞ւ Ռուսաստանը չմասնակցեց «Եվրատեսիլ 2017»-ին
Ուկրաինան արգելել էր «Եվրատեսիլ 2017» երգի մրցույթին ռուս մասնակից Յուլյա Սամոյլովայի մուտքը երկիր, քանի որ երգչուհին 2015-ին համերգով հանդես է եկել Ռուսաստանի կողմից բռնազավթված Ղրիմում՝ այդպիսով խախտելով ուկրաինական օրենքը: Մինչ Ռուսաստանի իշխանությունները դատապարտում են արգելքը՝ որակելով այն որպես «խտրականության հաշմանդամների դեմ », որոշ վերլուծաբանների կարծիքով՝ Մոսկվան օգտագործում է հաշմանդամությունը քաղաքական նպատակներով: Այս մասին հաղորդում է «Ամերիկայի ձայնը»:
Այս տարի Կիեվում կայացած «Եվրատեսիլ-2017» երգի մրցույթին հաղթեց պորտուգալացի Սալվադոր Սոբրալը: Նախքան մրցույթը Ռուսաստանը մեծ աղմուկ էր բարձրացրել այն բանից հետո, երբ ռուս երգչուհի Յուլյա Սամոյլովային թույլ չէին տվել մասնակցել մրցույթին:
«Մենք բոլորս ապշած ենք: Չգիտենք, թե ինչպես են (Ուկրաինայում) վերաբերվում հաշմանդամներին, բայց իմ կարծիքով՝ մենք այդպես չէինք վարվի: Վստահ չենք, որն է պատճառը և արդյոք նույն կերպ կվարվեին, եթե մասնակիցը հաշմանդամ չլիներ»,- հայտարարել է Ռուսաստանի համշանդամների միության համանախագահ Նադեժդա Լոբանովան:
Ի նշան բողոքի, Յուլյա Սամոլյովան ելույթ էր ունեցել Ղրիմում, ինչպես 2015 թվականին, որից հետո նրան արգելել էին մուտք գործել Ուկրաինա:
«Մենք հույս ունեինք, որ հաշմանդամի կատարումը Ուկրաինայում կհուզեր եվրոպացիներին: Սա շատ տգեղ քայլ էր», – հայտարարել է հաշմանդամների հարցերով փորձագետ և թարգմանչուհի Վերոնիկա Իվանովան:
Մոսկվան Կիևին մեղադրում է խտրականության մեջ այն պարագայում, երբ Ռուսաստանում հաշմանդամներն առայսօր լիարժեքորեն ինտեգրված չեն հասարակության մեջ և ունեն բազմաթիվ չլուծված խնդիրներ: Իվանովայի շենքի մուտքի առջև հաշմանդամների համար նախատեսված թեքահարթակի կառուցումը տևել է 5 տարի:
«Բյուրոկրատիայի պատճառով, ամեն ինչ շատ երկար է տևում, կամ ընդհանրապես ոչինիչ չի արվում: Վիճակն ավելի անմխիթար է մարզերում», ասում է Վերոնիկա Իվանովան:
Ի տարբերություն Մոսկվայի՝ որտեղ հասարակական վայրերի 85%-ը վերջին տասնամյակների ընթացքում մասամբ հարմարեցվել են սահմանափակ ֆիզիկական հնարավորություններով մարդկանց համար, Ռուսաստանի այլ մարզերում և քաղաքներում այս ուղղությամբ առաջընթաց չի գրանցվել:
Իվանովայի խոսքերով՝Եվրատեսիլի Ռուսաստանի մասնակցի հետ տեղի ունեցած միջադեպը լույս սփռեց Ռուսաստանում դեռևս առկա հաշմանդամության խնդիրներին:
Նշենք, որ Ուկրաինայի իշխանությունները պատժամիջոցներ են սահմանել մի շարք ռուսաստանյան ընկերությունների, այդ թվում՝ ВКонтакте-ի, Одноклассники-ի և Яндекс-ի նկատմամբ, որոնք պատկանում են Mail.ru հոլդինգին։ Պատժամիջոցներ են կիրառվել նաև մի շարք լրատվական կայքերի նկատմամբ։ Մասնավորապես՝ նախատեսվում է արգելափակել РБК-ի, НТВ-Плюс-ի,ТНТ-ի, Звезда-ի, ТВ Центр-ի և այլ լրատվամիջոցների հեռարձակումները։
