Մարտին Շուլցն Անկարային սպառնում է պատժամիջոցներով
Եվրոպական խորհրդարանի նախագահ Մարտին Շուլցը սպառնացել է Թուրքիայի իշխանություններին տուգանք կիրառող միջոցառումներով երկրում քաղաքական վիճակի զարգացումների լույսի ներքո, որտեղ վերջին օրերին տեղի են ունենում ընդդիմադիրների և լրագրողների զանգվածային կալանավորումներ:
«Մենք Եվրամիությունում պետք է մտածենք, թե ինչ տնտեսական պատժամիջոցներ կարող ենք կիրառել»,- հայտարարել է Շուլցն այսօր Bild am Sonntag թերթին տված հարցազրույցում:
Նա հիշեցրել է, որ մինչև 2016թ. վերջը պետք է տեղի ունենա մաքսային միության բարեփոխում, որն արդեն 20 տարի գործում է Թուրքիայի և ԵՄ-ի միջև:
«Ես չեմ կարող պատկերացնել, որ ընդդիմադիր պատգամավորների և լրագրողների կալանավորումներից հետո մենք կընդլայնենք մաքսային միությունը»,- հայտարարել է Եվրոպական խորհրդարանի նախագահը:
Ընդ որում, չնայած Թուրքիայում ստեղծված իրավիճակին, նա կարծում է, որ հնարավորության սահմաններում հարկ է շարունակել Անկարայի հետ բանակցությունները ԵՄ-ին անդամակցելու վերաբերյալ:
«Եթե մենք դադարեցնենք բանակցությունները, այլևս հնարավորություն չենք ունենա օգնել ընդդիմությանն ու բանտարկյալներին»,- հայտարարել է Շուլցը՝ ընդգծելով, որ երկխոսությունը կկասեցվի, եթե թուրքական իշխանությունները վերականգնեն մահապատիժը:
