ԼՂՀ ԱԺ-ում քննարկել են «Գյուղատնտեսական կոոպերատիվների մասին» օրենքի նախագիծ
ԼՂՀ ԱԺ արտադրության և արտադրական ենթակառուցվածքների հարցերի մշտական հանձնաժողովի նախաձեռնությամբ նոյեմբերի 9-ին տեղի է ունեցել ընդլայնված կազմով քննարկում՝ Աժ փոխնախագահ Վահրամ Բալայանի և պատգամավոր Ալյոշա Գաբրիելյանի առաջարկած «Գյուղատնտեսական կոոպերատիվների մասին» ԼՂՀ օրենքի նախագծի շուրջ:
Քննարկմանը մասնակցում էին խորհրդարանի պատգամավորներ, ԼՂՀ գյուղատնտեսության նախարար Արամ Մխոյանը և նախարարության պատասխանատուներ:
Ինչպես տեղեկացրին ԼՂՀ ԱԺ մամուլի ծառայությունից, նախագծի հեղինակները, ներկայացնելով օրինագիծը, նշել են, որ նախնական ուսումնասիրություններ են կատարել ոլորտում, զրուցել բնակչության հետ և համապատասխան հիմնավորումներ են ստացել ոլորտի մասնագետների կողմից: Նրանք առաջարկել են հավասար պայմաններ ապահովել գյուղատնտեսության զարգացման բոլոր ծրագրերին:
Գյուղատնտեսության նախարար Արամ Մխոյանն իր ելույթում նշել է այն բոլոր դրույթները, որոնք այս պահին կարող են խոչընդոտել կոոպերացիաների ծրագրին և ներկայացրել առաջարկներ՝ օրինագծում համապատասխան շտկումներ կատարելու համար:
Քննարկման ընթացքում պատգամավորները հեղինակներին են առաջադրել օրինագծի կազմակերպաիրավական կողմերին վերաբերող հարցեր:
ԱԺ արտադրության և արտադրական ենթակառուցվածքների հարցերի մշտական հանձնաժողովի նախագահ Արպատ Ավանեսյանի առաջարկությամբ պատգամավորներին տրվել է երկու շաբաթ ժամանակ՝ ոլորտի մասնագետների և պատասխանատուների հետ խորհրդակցելու և նախագծում համապատասխան շտկումներ կատարելու համար:
