Բեսլանի մոտ ավտոբուսի վթարից տուժած ՀՀ երկու քաղաքացիները տեղափոխվել են վերակենդանացման բաժանմունքից
ՀՀ արտակարգ իրավիճակների նախարարության Ճգնաժամային կառավարման ազգային կենտրոնից հոկտեմբերի 15-ի ժամը 20.00-ին կապ է հաստատվել Հյուսիսային Օսեթիայի Հանրապետության Վլադիկավկազ քաղաքի հանրապետական հիվանդանոցի վերակենդանացման բաժանմունքի հերթապահ բժշկի հետ, ով հայտնել է, որ ժամը 18.30-ի դրությամբ՝ ՀՀ 2 քաղաքացիներին՝ Հարությունյան Ժ. Մ.-ին և Պողոսյան Ս. Ս.-ին տեղափոխել են Բեսլան քաղաքի «Հյուսիսկովկասյան բազմապրոֆիլ բժշկական կենտրոն»:
Նրանց առողջական վիճակները գնահատվում է ծանր:
Ժամը 14.10-ին ՌԴ-ում ՀՀ ԱԻՆ ներկայացուցիչ փ/ծ գնդապետ Ա. Ղազարյանից տեղեկություն է ստացվել, որ ՀՀ արտակարգ իրավիճակների, առողջապահության, տրանսպորտի, կապի և տեղեկատվական տեխնոլոգիաների նախարարությունների աշխատակիցներից բաղկացած աշխատանքային խումբը այցելել է ՌԴ Վլադիկավկազի հանրապետական և կլինիկական հիվանդանոցներ, տեղում ծանոթացել է տուժածների (որոնք ինչպես հաղորդվել էր նախկինում 4 են) առողջական վիճակին, զրուցել բժիշկների հետ:
Նախկինի պես տուժածների վիճակը մնում է անփոփոխ, նրանցից 3-ը՝ Հարությունյան Ժ. Մ.-ը (1949 թ. ծնված), Պողոսյան Ս. Ս.-ը (1990 թ. ծնված) և Բաղդասարյան Հ. Մ.-ը (1949 թ. ծնված) գտնվում են վերակենդանացման բաժանմունքում և նրանց վիճակը գնահատվում է ծանր, իսկ Ծատինյան Ա. Ն.-ինը (1984 թ. ծնված)՝ միջին ծանրության:
«Սուրբ Գր. Լուսավորիչ» ԲԿ բուժօգնության դիմած Գևորգյան Վ.-ն դուրս է գրվել հիվանդանոցից:
Հոկտեմբերի 14-ին, ժամը 04.30-ին (Երևանի ժամանակով՝ 05.30-ին) ՌԴ ԱԻՆ ճգնաժամային կառավարման կենտրոնից տեղեկություն էր ստացվել, որ Վլադիկավկազ-Բեսլան շրջանցիկ ավտոճանապարհի 8րդ կմին «Մերսեդես Բենց-0404-15R» մակնիշի 50 AA 515 պետհամարանիշի մարդատար ավտոբուսը ՄոսկվաԵրևան երթուղին իրականացնելիս բախվել է «Սկանիա» մակնիշի բեռնատար ավտոմեքենային: Պատահարի հետևանքով զոհվել են 5 մարդ, վիրավորվել՝ 27 ուղևոր:
