Պակիստանում համալսարանի զոհերի թիվը հասել է 20-ի
Պակիստանի հյուսիս-արևմուտքում գտնվող Չարսադդա քաղաքում գտնվող համալսարանի վրա զինյալների հարձակման հետևանքով, վերջին տվյալների համաձայն, սպանվել է նվազագույնը 20 մարդ, վիրավորվել է գրեթե 50 մարդ, հայտնում է BBC-ն:
Հարձակման պատասխանատվությունն ստանձնել է Պակիստանում գործողն «Թալիբան» ահաբեկչական խմբավորումը:
Իշխանությունները հայտարարում են, որ հարձակվողներից 4-ն սպանվել են, համալսարանում ավարտվել է հրաձգությունը, որը շարունակվում էր գրեթե 3 ժամ:
Դեռ հայտնի չէ, թե քանի մարդ է եղել ահաբեկիչների թվում ու դեռ քանիսն է թաքնված համալսարանի տարածքում: Զինյալներն արգելափակվել էին համալսարանի երկրորդ ու երրորդ հարկերի թևում: Ուսանողների ու դասախոսական անձնակազմի մեծ մասը տարհանվել է, սակայն մի մասը դեռ համալսարանի շենքում է: Հարձակման պահին համալսարանի տարածքում գտնվել է շուրջ 3 հազար ուսանող:
Հարձակումն սկսվել էր այսօր առավոտյան՝ տեղի ժամանակով ժ. 9.30-ին:
Հաղորդվում է նվազագույնը 20 սպանվածի մասին: Շինությունը շրջափակված է, իշխանությունները ենթադրում են, որ հարձակվողները դեռ գտնվում են ներսում:
Թալիբների ներկայացուցչի խոսքով՝ հարձակումը ուսումնական հաստատության վրա եղել է ի պատասխան պակիստանցի զինվորականների կողմից իրենց դիրքերի վրա հարձակման:
