Արգանի յուղ. Բուժիչ հատկությունները
Արգանի յուղը (Moroccan Argan Oil) ստանում են արգանի ծառի պտուղներից: Այս ծառը հանդիպում է հիմնականում Մարոկկոյում, Ալժիրում և Իսրայելում:
Արգանի յուղը համարվում է ամենաթանկ, ամենաարժեքավոր և ամենահազվադեպ յուղերից մեկը: Այս յուղը հայտնի է իր բուժիչ և յուրահատուկ հատկանիշներով: Հատկանշական է, որ 1լ յուղ ստանալու համար հարկավոր է 100կգ պտղի սերմեր մզել, այդ իսկ պատճառով այն չի կարող էժան լինել:
Արգանի յուղն ունի վերականգնող հատկանիշներ և հաշվի չի առնում տարիքը. այն դարձել է այն հրաշք բաղադրիչներից մեկը, որն օգտագործվում է դեմքի, մազերի, մարմնի խնամքի միջոցների մեջ:
Արգանի յուղը պարունակում է վիտամին A, E, F, տոկոֆերոլ, ֆիտոստերոլ, պոլիֆենոլ, օլեինային և լինոլային թթուներ, ստերին:
Արգանի յուղը կարող եք օգտագործել՝ որպես դեմքի մաշկի, մազերի և եղունգների խնամքի միջոց: Այն վերականգնում է մազերի և մաշկի բնական թարմությունն ու փափկությունը: Յուղը հեշտորեն ներթափանցում է մազարմատների մեջ, սնուցում է դրանք և ամրացնում:
- Արգանի յուղի մեջ առկա օլեինային թթուները մեկ ամսվա ընթացքում նվազեցնում են խոլեստերինի մակարդակը: Վերջին հետազոտությունների արդյունքում ապացուցվել է, որ արգանի յուղի մի փոքր քանակությունը կարող է նվազեցնել խոլեստերինը:
- Յուղի բաղադրության մեջ առկա թթուներն օգտակար են օրգանիզմի մի քանի ֆունկցիաների համար. բարձրացնում են իմունիտետն ու ունեն հակաբորբոքային հատկանիշներ: Վիտամին Е-ի մեծ քանակության շնորհիվ՝ այս յուղն առողջարար է սրտանոթային հիվանդություններ ունեցող մարդկանց համար:
- Արգանի յուղը պարունակում է ստերիններ, որոնք խցանում են աղիներում խոլեստերինի ներծծումը, ինչպես նաև ապացուցված է, որ յուղն ունի հակաքաղցկեղային հատկանիշներ:
- Յուղն օգտակար է արթրիտի և ռևմատիզմի ժամանակ:
- Արգանի յուղն արդյունավետ կերպով պայքարում է այրվածքների, կապտուկների և մաշկի բորբոքային հիվանդությունների դեմ:
- Խոհարարության մեջ արգանի յուղն օգտագործվում է մի քանի կերակուրներ պատրաստելու համար՝ ձկներ, աղցաններ, ապուրներ, աղանդեր:
- Արգանի յուղի կոսմետիկ օգտագործումը: Այս յուղն օգտագործվում է մազերն ու եղունգներն ամրացնելու համար, վերացնում է թեփը, պաշտպանում է մաշկն ուլտրամանուշակագույն ճառագայթներից:
- Արգանի յուղն օգտագործվում է նաև ակնեն, մաշկի բորբոքային հիվանդությունները բուժելու համար:
- Վերականգնում է վնասված մազերը, բուժում է թեփը և կանխում է մազաթափությունը, չոր մազերին փայլ է հաղորդում:
- Կանխարգելում է մաշկի վրա հատկապես հետծննդաբերական ծալքերի առաջացումը:
- Խորհուրդ է տրվում օգտագործել կոտրատվող եղունգների դեպքում:
- Արգանի յուղը նվազեցնում է սպիները և դրանց հետքերը, հանում է բշտիկների բորբոքումները, պայքարում է փսորիազի և էկզեմայի դեմ:
- Օգտագործվում է հանգստացնող մերսման ժամանակ, հանում է լարվածությունն ու մկանային ցավերը:
- Օգտագործվում է՝ որպես մաշկը սնուցող միջոց, պաշտպանում է մաշկը սառը եղանակին, արևայրուքից հետո:
- Արգանի յուղը համարվում է ամենահայտնի հակատարիքային միջոցը: Այն կանխարգելում է մկանների դեգեներացիան և ժամանակից շուտ ծերացումը, նվազեցնում է կնճիռները: Կանխարգելում է ջրազրկումը, վերականգնում է հյուսվածքային կառուցվածքը, մաշկն էլաստիկ է դարձնում:
Արգանի յուղի օգտագործումը
Արգանի յուղը հարուստ է մաշկի և եղունգների համար անփոխարինելի սննդարար տարրերով, այդ իսկ պատճառով այն օգտագործվում է քիչ քանակությամբ: Արգանի մի քանի կաթիլը բավական է մաշկի համար: Գլխամաշկի և մազերն ամրացնելու համար ավելի արդյունավետ լինելու համար, արգանի յուղն օգտագործվում է քաղցր նշի յուղի հետ խառնած վիճակում: Յուղը նաև հանգստացնող ազդեցություն ունի արթրիտի և ռևմատիզմի դեպքում:
Կանոնավոր օգտագործման դեպքում արգանի յուղը վերականգնում է մաշկի ձգությունն ու կանխարգելում է հղիության ընթացքում բծերի առաջացումը: Եթե ցանկանում եք արգանի յուղն օգտագործել դեմքի մաշկի համար, ապա համոզվեք, որ յուղը կոսմետիկ է, այլ ոչ թե՝ սննդային:
Արգանի յուղը կարելի է օգտագործել քսուքների և լոսյոնների հետ, բավական է մի քանի կաթիլ քսել դեմքին և մերսել նուրբ շարժումներով: Արգանի յուղը խորհուրդ է տրվում օգտագործել չոր մաշկի համար՝ որպես խոնավեցնող միջոց: Որպես հակատարիքային միջոց օգտագործելու համար բավական է օրական 2 անգամ յուղը քսել դեմքին՝ ցանկալի արդյունքի հասնելու համար:
Արգանի յուղը՝ ձեռքերի և եղունգների համար
Արգանի յուղն առավել արդյունավետ դարձնելու համար հարկավոր է խառնել կիտրոնի հյութով՝ 50/50 հարաբերությամբ, մատները դրեք խառնուրդի մեջ 10-15 րոպե: Այս նույն գործողությունը կարող եք կրկնել ոտքերի համար:
Արգանի յուղը՝ մազերի համար
Արգանի յուղը վերականգնում է մազերի փայլը, լավագույնս սնուցում է ու օգնում է ճյուղավորված մազերի դեպքում:
Արգանի յուղն օգտագործվում է մազերի բուժման, գլխամաշկի չորության և վնասված մազերը վերականգնելու համար:
Գլուխը լվանալուց 30 րոպե առաջ նուրբ մերսող շարժումներով յուղը քսեք գլխամաշկին և մազերին, ապա գլուխը փաթաթեք տաք սրբիչով: 30 րոպե հետո գլուխը լվացեք շամպունով:
Յուղը հնարավոր է օգտագործել նաև՝ որպես մազերի գել: Տնից դուրս գալուց առաջ 3-4 կաթիլ քսեք ձեռքերին և տարածեք մազերի վրա, սա մազերին փայլ և թարմություն կհաղորդի:
Արգանի յուղը՝ մարմնի խնամքի միջոց
Արգանի յուղով մերսումը լավացնում է մաշկի ձգությունը, սնուցում է և հանգստացնում է ողնաշարը: Յուղը հեշտ ներծծվում է մաշկի մեջ՝ չթողնելով յուղոտ հետքեր, խոնավեցնում և պաշտպանում է մաշկը չորությունից:
Արգանի յուղն օգնում է արևի տակ մնալուց հետո, խոնավեցնում է մաշկը: Չի կարելի օգտագործել յուղն արևի տակ լինելուց առաջ կամ այդ ընթացքում:
Նյութը հրապարակման պատրաստեց Լիլիթ Հարությունյանը
