Զինծառայողների ծնողները այցելել են իրենց զավակներին
Երևանի քաղաքապետ Տարոն Մարգարյանի նախաձեռնությամբ արդեն հինգերորդ անգամ երևանաբնակ ժամկետային զինծառայողների ծնողները հնարավորություն են ստացել տեսակցության այցելել սահմանամերձ զորամասերում ժամկետային ծառայություն անցնող իրենց զավակներին: Հերթական այցի շրջանակում Տավուշի, Սյունիքի մարզերի և ՀՀ հարավարևելյան սահմանամերձ զորամասեր են մեկնել ավելի քան 1000 ժամկետային զինծառայողների ծնողներ: Ավանդույթի համաձայն ծնողներին ճանապարհել են Երևանի քաղաքապետ Տարոն Մարգարյանն ու ՀՀ ՊՆ Սեյրան Օհանյանը:
Այս անգամ էլ, ինչպես նախորդ բոլոր այցելությունների ժամանակ, Երևանի քաղաքապետարանը հոգացել էր, որ ճանապարհին ծնողները որևէ հոգս չունենան: Բարձրակարգ ավտոբուսների շարասյանը ճանապարհի ամբողջ երկայնքով ուղեկցել է ճանապարհային ոստիկանությունը: Ավտոբուսներից յուրաքանչյուրում նաև բժիշկներ են եղել:
Նախքան զինվոր որդիներին հանդիպելը, ծրագրի շրջանակում ինքնաբուխ ձևավորված ավանդույթի համաձայն, ծնողները նախ եղան Շուշիում, ուր Ղազանչեցոց Սուրբ Ամենափրկիչ եկեղեցում մոմեր վառեցին և աղոթք հղեցին առ Աստված՝ հանուն երկրի խաղաղության, իրենց որդիների առողջության ու անփորձանք ծառայության: Սուրբ Ամենափրկիչ եկեղեցու հովիվ Տեր Անդրեաս Թավադյանը, առիթն օգտագործելով, իր օրհնանքը փոխանցեց Երևանի քաղաքապետ Տարոն Մարգարյանին՝ այս նախաձեռնության համար:
Այցելած բոլոր զորամասերում ծնողների համար հատուկ ընդունելություն էր կազմակերպվել՝ ավանդական աղ ու հացով, զինվորական նվագախմբով ու տողանով: Զորամասերում ծնողները նաև ծաղիկներ են խոնարհել Սպարապետ Վազգեն Սարգսյանի, զոհված ազատամարտիկների հուշարձաններին: Ծառայության մեջ աչքի ընկած զինվորները հանդիսավոր պայմաններում պարգևատրվել են Երևանի քաղաքապետ Տարոն Մարգարյանի շնորհակալագրերով, իսկ որոշ սպաներ՝ Երևանի քաղաքապետարանի զինանշանով ժամացույցներով: Բոլոր զորամասերին Երևանի քաղաքապետարանի կողմից տրամադրվել է նաև անհրաժեշտ տեխնիկա: Այն զինվորներին, որոնց ծննդյան օրը համընկել էր այցելությանը, հաճելի անակընկալ էր սպասվում. Երևանի քաղաքապետի կողմից նրանց հատուկ նվերներ փոխանցվեցին:
Հուզիչ անակնկալ էր սպասվում նաև այն զինվորներին, ովքեր մայրաքաղաքում հարսնացու ունեին. քաղաքապետի հանձնարարությամբ նաև հարսնացուներն էին այցելել զորամասեր, ուր և հանդիպեցին իրենց զինվոր նշանածների հետ ու նրանցից փափուկ խաղալիքների տեսքով նվերներ ստացան: Հրամանատարությունը զինծառայողների ծնողներին հնարավորություն է ընձեռել շրջել զորամասերում, ծանոթանալ իրենց զավակների ծառայության պայմաններին: Ցանկացողները եղել են նաև ճաշարաններում, ծանոթացել ճաշացանկին:
Կարևորելով սոցիալական նշանակություն ունեցող այս նախաձեռնությունը՝ ինչպես զինծառայողների ծնողները, այնպես էլ իրենք՝ զինծառայողները, իրենց երախտագիտությունն են փոխանցել քաղաքապետ Տարոն Մարգարյանին`պարբերաբար ցուցաբերվող ուշադրության և վերաբերմունքի համար:
Այցելության ծրագրում ընդգրկված բոլոր զորամասերի հրամանատարները ևս մեկ անգամ ընդգծել են, որ Երևանի քաղաքապետի այս նախաձեռնությունը ոչ միայն սոցիալական, այլև բարոյահոգեբանական շատ կարևոր նշանակություն ունի և իր նպաստն է բերում բանակ-հասարակություն կապի ամրապնդման, զինված ուժերի մարտունակության բարձրացման գործին:
