ԵՄ-ն բավարար արագությամբ և արդյունավետությամբ չի մեծացնում պաշտպանական ներուժը. զեկույց
Եվրոպական միությունը բավարար արագությամբ և արդյունավետությամբ չի մեծացնում իր պաշտպանական ներուժը, որպեսզի հասնի սահմանված նպատակին՝ մինչև 2030 թվականը պատրաստ լինել պաշտպանվելու Ռուսաստանից, ասվում է ԵՄ զեկույցի ամփոփագրում, որը պատրաստվել է միության ղեկավարների համար, և որին ծանոթացել է Reuters գործակալությունը։
«Անբարենպաստ և վատթարացող անվտանգության միջավայրի հետ կապված խնդիրները, ինչպես նաև Ռուսաստանի ագրեսիայից բխող սպառնալիքը հաղթահարելու համար անհրաժեշտ է գործել զգալիորեն ավելի արագ և ձեռնարկել շատ ավելի լայնածավալ քայլեր, քան այժմ, որպեսզի մինչև 2030 թվականը հասնենք պաշտպանական պատրաստվածության անհրաժեշտ մակարդակին»,- ասվում է Եվրոպական պաշտպանության գործակալության փաստաթղթում։
«2030 թվականի պատրաստվածության նպատակի հասնելու համար Եվրոպային անհրաժեշտ է վճռական շրջադարձ պաշտպանական ներդրումների ծավալի և տեմպերի, ռազմական ներուժի զարգացման և արդյունաբերական բազայի ամրապնդման հարցում»,- նշվում է զեկույցում։
